30.10.2026 | 16:27
«Արծվիկ Մինասյանը շարունակում է ՀՅԴ անդամ լինել»․ ԱԺ-ում քննարկվում է նրա թեկնածության հարցը․ ՏԵՍԱՆՅՈՒԹ
Ամանորյա զարդարանք՝ խցանումների գնով․ NO COMMENT
Հասարակություն
21.11.2022 | 18:15
Այսօր առավոտյան 09:00-ից մինչև 12․00-ը փակ էր Մաշտոցի պողոտայի՝ Մատենադարանից մինչև Իսահակյան հատվածի երթևեկությունը, իսկ 12:00-ից մինչև 18:00-ը՝ Իսահակյան փողոցից Սայաթ-Նովա փողոց հատվածի երթևեկությունը: Վաղը կրկին ժամը 09:00-ից մինչև 16:00-ը փակ կլինի Մաշտոցի պողոտայի՝ Թումանյան փողոցից մինչև Սայաթ-Նովա փողոց հատվածի երթևեկությունը:
Երևանի կենտրոնական փողոցներում ամանորյա զարդարանքի աշխատանքներ են իրականացվում շուրջ 1 ամիս։ Փողոցները մի քանի ժամով փակվում են հիմնականում առավոտից մինչև երեկո՝ անհարմարություններ ստեղծելով քաղաքացիների համար։ Երևանի քաղաքապետարանի լրատվության վարչությունից Factor TV-ին վստահեցրին, որ այդ աշխատանքներն արվում են նաև երեկոյան ժամերին։
«Առանձին փողոցներ կան, որտեղ ձևավորման համար ցերեկային լույս է անհրաժեշտ, որպեսզի սխալների ուղղման կարիք չլինի, այդ պատճառով երեկոյան ժամերին չեն կարող աշխատանքներ իրականացվել։ Ժամանակը սուղ է, և քաղաքի կենտրոնը չզարդարելն անհնար է։ Միջազգային մեծ միջոցառում է լինելու, որն իրենից ենթադրում է քաղաքը ներկայացնել հավուր պատշաճի։ Ամեն ինչ անում ենք, որ քաղաքը շատ չտուժի դրանից»,- պարզաբանեցին լրատվության վարչությունից։
Քաղաքապետարանից ասում են, որ առավոտից մինչև երեկո կամ միայն ցերեկն իրականացվող աշխատանքները մեծածավալ չեն և երկարատև խցանումներ չեն առաջացնում։ Այնինչ, Factor TV-ի տեսախցիկն այսօր արձանագրել է, որ այդ աշխատանքները քաղաքի տարբեր հատվածներում տևական խցանումների պատճառ են դարձել։
Հանրապետության հրապարակի՝ գլխավոր տոնածառի մոնտաժման աշխատանքները ևս այս տարի շուտ են սկսվել։ Ամանորյա ձևավորման աշխատանքները սովորականից ավելի վաղ սկսելու պատճառը դեկտեմբերի 11-ին Երևանում անցկացվելիք «Մանկական Եվրատեսիլ» երգի միջազգային մրցույթն է։ Դեկտեմբերի 5-ին էլ տարբեր երկրներից ժամանած պատվիրակությունները կմիացնեն գլխավոր տոնածառի լույսերը։
Մանրամասները՝ տեսանյութում։
Արփի Հակոբյան
