13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
Ալիևին շարունակում են հանգիստ չտալ Հայաստան-Ֆրանսիա հարաբերությունները
Քաղաքականություն
21.11.2022 | 21:44
Ադրբեջանի նախագահ Իլհամ Ալիևն այսօր իր ղեկավարած իշխող «Նոր Ադրբեջան» կուսակցության հիմնադրման 30-ամյակին նվիրված միջոցառմանը կրկին հայատյաց հայտարարություններով է հանդես եկել։ Ալիևին կրկին հանգիստ չեն տալիս Հայաստանի և Ֆրանսիայի հարաբերություններն ու գործակցությունը։ Տեղական լրատվականների փոխանցմամբ՝ նա հայտարարել է, որ, իբր, Թունիսում Ֆրանկոֆոնիայի գագաթնաժողովում Բաքուն կանխել է Հայաստանի և Ֆրանսիայի համատեղ «սադրանքը» Ադրբեջանի դեմ։
Մշտապես փողոցային բառապաշարով աչքի ընկնող Ադրբեջանի նախագահը, որը, ի դեպ, վերջերս Ֆրանսիայի նախագահ Էմանուլ Մակրոնին որոշել էր վարքագծի կանոնների դասեր տալ, իրեն հատուկ ոճով է հանդես եկել։
«Վերջերս Ֆրանկոֆոնիայի կազմակերպության շրջանակում, որի անդամը մենք չենք հանդիսանում, բայց, չգիտես ինչու, Հայաստանն անդամակցում է, ծրագրված էր կեղտոտ սադրանք Ադրբեջանի դեմ։ Այս սադրանքի հեղինակը Ֆրանսիան էր, այն Ֆրանսիան, որն այժմ հովանավորում է Հայաստանին։ Հայաստանն ու Ֆրանսիան միմյանց անվանում են քույրեր։ Նրանք կարող էին միմյանց անվանել եղբայրներ, սակայն, չգիտես ինչու, անվանում են քույրեր։ Գագաթնաժողովում պատրաստված բանաձևի նախնական տարբերակը հիմնված էր բացառապես հակաադրբեջանական թեզերի վրա և լիովին հակասում էր իրականությանը։ Բայց բոլոր հակաադրբեջանական թեզերը բացառվեցին՝ շնորհիվ Ֆրանկոֆոնիայի կազմակերպությունում մեր ընկերների»,- ասել է Ալիևը։
Առանց Թուրքիայի նախագահ Ռեջեփ Թայիփ Էրդողանի քայլ չանող Ադրբեջանի նախագահին, ըստ երևույթին, չեն տեղեկացրել, որ կազմակերպությունն ընդունել է «Ֆրանկոֆոն տարածքում ճգնաժամային իրավիճակների, դրանց հաղթահարման և խաղաղության ամրապնդման վերաբերյալ» բանաձևը, որով անդամ երկրներն իրենց աջակցությունն ու համերաշխությունն են հայտնել Հայաստանին։
Էմմա Չոբանյան
