Փաշինյանը հարցաքննվել է. վարչապետն առանձնազրույց կունենա Պուտինի հետ. ԼՈՒՐԵՐ

• «ՀՀ վարչապետ Նիկոլ Փաշինյանը Քննչական կոմիտեում վկայի կարգավիճակով հարցաքննվել է»,- այս մասին Factor.am-ի գրավոր հարցմանն ի պատասխան հայտնում են Քննչական կոմիտեից: Ըստ նրա՝ Փաշինյանը հարցաքննվել է 2020 թվականի սեպտեմբերի 27–ից նոյեմբերի 9-ն ընկած ժամանակահատվածում Ադրբեջանի կողմից Արցախի դեմ սանձազերծած ագրեսիվ պատերազմի ընթացքում ՀՀ բարձրաստիճան պաշտոնատար մի խումբ անձանց կողմից իրենց պաշտոնեական լիազորությունները չարաշահելու ենթադրյալ հանցագործության դեպքի առթիվ հարուցված քրեական գործի շրջանակներում:
• ՌԴ նախագահ Վլադիմիր Պուտինն առանձնազրույց կունենա Նիկոլ Փաշինյանի հետ։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, փոխանցում է ՏԱՍՍ-ը։ Ըստ Պեսկովի՝ առանձնազրույցը նախատեսվում է նոյեմբերի 23-ին ՀԱՊԿ գագաթնաժողովի շրջանակներում։ Ավելի վաղ Կրեմլից հայտնել էին, որ ՌԴ նախագահ Վլադիմիր Պուտինն անձամբ է մասնակցելու Երևանում կայանալիք ՀԱՊԿ նիստին։ Հիշեցնենք, որ նոյեմբերի 23-ին Երևանում տեղի է ունենալու ՀԱՊԿ գագաթնաժողովը, որի ընթացքում քննարկվելու է նաև Հայաստանին օգնություն ցուցաբերելու հարցը։
• Հայաստանի արտաքին գործերի նախարարի տեղակալ Մնացական Սաֆարյանը հանդիպել է Իրանի արտաքին գործերի նախարար Հոսսեյն Ամիր Աբդոլլահիանի հետ: Ինչպես տեղեկացնում է «Արմենպրես»-ը,վկայակոչելով «IRNA» գործակալությանը, Ամիր Աբդոլլահիանը հանդիպման ժամանակ գոհունակություն է հայտնել երկու բարեկամ և հարևան երկրների միջև սերտացող հարաբերությունների կապակցությամբ: Սաֆարյանը բարձր է գնահատել Իրանի Իսլամական Հանրապետության սկզբունքային և կառուցողական դիրքորոշումը տարածաշրջանի երկրների ինքնիշխանության եւ նրանց միջազգային սահմանների անփոփոխ կարգավիճակի վերաբերյալ:

Այս ժամի լուրերը՝ տեսանյութում։