Թուրքիայի ՆԳ նախարարը կրկին ԱՄՆ-ին է մեղադրել Ստամբուլի պայթյունի մեջ

Թուրքիայի ներքին գործերի նախարար Սուլեյման Սոյլուն կրկին ակնարկել է, որ նոյեմբերի 13-ին Ստամբուլում տեղի ունեցած պայթյունի հետևում կանգնած է ԱՄՆ-ը, որի հետևանքով 6 մարդ զոհվել էր, ևս 81-ը` վիրավորվել, գրում է Bianet-ը։

Նա նշել է, որ հարձակումը փորձ էր` «ներքաշել Թուրքիային գլոբալ անկայունություն»։ Սոյլուն այս մասին ասել է այսօր խորհրդարանի պլանավորման և բյուջեի հանձնաժողովի նիստում, որտեղ ներկայացրել է նախարարության 2023 թվականի բյուջեի նախագիծը։

«Համաշխարհային վարպետների, հատկապես՝ ԱՄՆ-ի կողմից տրված ուղերձը կոչված է կանխելու Թուրքիային, որը գտնվում է լիակատար անկախության ճանապարհին, և կանխելու նրա ջանքերը՝ կայունություն հաստատելու շրջակա տարածաշրջաններում և իր խոսքերն աշխարհին ասելու համար։ Իսթիքլալ պողոտայի հարձակումը PKK-ի անթիվ քաղաքացիական ջարդերից մեկն է, որը մենք տեսել ենք: Մենք գտանք հանցագործին: Այժմ մենք բացահայտում ենք դրա հետևում գտնվող կառույցը»,- ասել է թուրք նախարարը։

Հիշեցնենք, որ Ստամբուլի պայթյունի հաջորդ օրը հայտարարվել էր, որ Անկարան չի ընդունում ԱՄՆ-ի ցավակցությունները։

«Մենք չենք ընդունում և մերժում ենք ԱՄՆ դեսպանատան ցավակցությունները Ստամբուլում ահաբեկչության հետ կապված։ Մենք ստացել ենք մեզ ուղղված հաղորդագրությունը։ Մենք  գիտենք՝ ինչ է տեղի ունեցել, մենք վճռականորեն կպատասխանենք»,- ասել էր Սոյլուն։

Ի պատասխան՝ Թուրքիայում ԱՄՆ դեսպանատան խոսնակն ասել էր, որ «ԱՄՆ-ը դատապարտում է ահաբեկչությունն իր բոլոր ձևերով»։

Թուրքիայի իշխանությունները պայթյունի համար մեղադրում են քրդական YPG-ին և Քուրդիստանի աշխատավորական կուսակցությանը (PKK): Անկարան պնդում է, որ YPG-ն, որին Վաշինգտոնն աջակցում է Սիրիայում, PKK-ի թևն է: Թուրքիայի ոստիկանությունը պայթյունի իրականացման համար ձերբակալել է սիրիացի կնոջ, որին մեղադրում է PKK-ի կապերի մեջ։ PKK-ն, սակայն, հերքել է իր ներգրավվածությունը պայթյունին՝ նշելով, որ չի թիրախավորում քաղաքացիական անձանց։

Էմմա Չոբանյան