Վահրամ Դումանյանը ներկա է եղել լեգենդար երաժիշտների երևանյան համերգին

ՀՀ ԿԳՄՍ նախարարության աջակցությամբ, Արամ Խաչատրյան համերգասրահում լեգենդար երաժիշտներ՝ դաշնակահար Միխայիլ Պլետնյովը և դիրիժոր Վլադիմիր Ֆեդոսեևը հանդես են եկել Հայաստանի ազգային ֆիլհարմոնիկ նվագախմբի հետ (գեղարվեստական ղեկավար և գլխավոր դիրիժոր՝ Էդուարդ Թոփչյան)․ տեղեկացնում են ԿԳՄՍՆ-ից։

Համերգին ներկա է եղել ՀՀ ԿԳՄՍ նախարար Վահրամ Դումանյանը:

Համերգային ծրագրում հնչել է Չայկովսկու Դաշնամուրի թիվ 1 կոնցերտը և Սիմֆոնիա թիվ 5-ը:

Չայկովսկու գրած երեք դաշնամուրային կոնցերտներից առաջինն իրավամբ արժանացել է մեծ ճանաչման և սիրվել է երաժշտության քնարական ոգեշնչման, գույների զարմանալի հարստության և առատ մեղեդայնության շնորհիվ: Չայկովսկին իր 5-րդ սիմֆոնիան գրել է 4-րդ սիմֆոնիայից մոտ տասնմեկ տարի անց: Նրան տանջում էին կասկածները. արդյո՞ք չի սպառվել իր երևակայությունը, արդյո՞ք դեռ կարող է մեծ կտավի սիմֆոնիկ ստեղծագործություններ գրել: 5-րդ սիմֆոնիայով Չայկովսկին ապացուցել է, որ 19-րդ դարի և առհասարակ երաժշտության պատմության մեջ լավագույն սիմֆոնիստներից մեկն է: Միխայիլ Պլետնյովի փայլուն կատարումը, ինչպես երաժշտագետներն են նշում, ներդաշնակ է Չայկովսկու հանճարեղ գործերին:

Պլետնյովը նաև հրաշալի դիրիժոր և կոմպոզիտոր է, որի արվեստը դուրս է ավանդական դասակարգումներից: Նա բազմաթիվ հեղինակավոր մրցույթների, այդ թվում՝ Չայկովսկու անվան միջազգային մրցույթի և «Գրեմմիի» գլխավոր մրցանակակիր է, ելույթներ է ունեցել աշխարհի ամենահեղինակավոր բեմերում և ամենահայտնի նվագախմբերի հետ: Երաժշտաքննադատները նրան համարում են «կատարողական արվեստի մեջ մրցակցությունից դուրս» դաշնակահար: BBC-ի երաժշտական մեկնաբաններից մեկը այսպես է բնութագրել Պլետնյովի կատարումները. «Միայն Սկարլատիի դաշնամուրային սոնատի կատարումը նրան դասում է աշխարհի մեծագույն դաշնակահարների շարքում»:

Դիրիժոր Վլադիմիր Ֆեդոսեևը ԽՍՀՄ ժողովրդական արտիստ է, Պ. Ի. Չայկովսկու անվան պետական ակադեմիական մեծ սիմֆոնիկ նվագախմբի գեղարվեստական ղեկավարն ու գլխավոր դիրիժորը (1974 թվականից), եղել է նաև Վիեննայի սիմֆոնիկ նվագախմբի գլխավոր դիրիժորը (1997–2006 թթ.), Ցյուրիխի օպերայի մշտական հրավիրյալ դիրիժորը (1997 թվականից), Տոկիոյի ֆիլհարմոնիկ նվագախմբի առաջին հրավիրյալ դիրիժորը (2000 թվականից), Բավարիայի ռադիոյի սիմֆոնիկ (Մյունխեն), Ֆրանսիայի ռադիոյի ազգային ֆիլհարմոնիկ նվագախմբերի (Փարիզ) հրավիրյալ դիրիժորը: