31.10.2026 | 13:33
Ամերիկյան ինդեքսները նվազել են
«Հյուսիսային հոսքի» վնասված հատվածում պայթուցիկի հետքեր են հայտնաբերվել
Քաղաքականություն
18.11.2022 | 16:50
Շվեդ դատախազը, որը հետաքննում է «Հյուսիսային հոսք 1» և Հյուսիսային հոսք 2» գազատարների վնասները, հաստատել է, որ պայթյունները դիվերսիա են եղել, քանի որ տեղում պայթուցիկի հետքեր են հայտնաբերվել։ Այս մասին ասված է դատախազ Մատս Յունգքվիստի հայտարարության մեջ, փոխանցում է BBC-ի ռուսական ծառայությունը։
Նրա խոսքով՝ զննության ընթացքում, որն իրականացվել է Բալթիկ ծովում գազատարների վնասման վայրում, առգրավվել են համապատասխան ապացույցներ։
«Վերլուծությունները ցույց են տվել, որ պայթուցիկի հետքեր են հայտնաբերվել մի քանի օտար առարկաների վրա»,- ասել է դատախազը։
Նախաքննությունը շարունակվում է։
Սեպտեմբերի վերջին «Հյուսիսային հոսք 1» և «Հյուսիսային հոսք 2» խողովակաշարերում լայնածավալ պայթյունների պատճառով տեղի է ունեցել գազի արտահոսք, որը տեսանելի էր Բալթիկ ծովի մակերևույթից։ Եվրոպայում ռուսական գազատարի ճյուղերի վրա տեղի ունեցած միջադեպերը դիտավորյալ գործողությունների արդյունք են համարվում։
Ռուսաստանի Պաշտպանության նախարարությունը մեղադրել է Մեծ Բրիտանիային պայթյուններին մասնակցելու մեջ։ Լոնդոնը, սակայն, հերքում է մեղադրանքը։
Տաթև Ֆռանգյան
