Ալիևն ու Միշուստինը Բաքվում քննարկել են երկկողմ հարաբերությունները

Ադրբեջանի նախագահ Իլհամ Ալիևն այսօր ընդունել է ՌԴ վարչապետ Միխայիլ Միշուստինին, որը  նախօրեին Բաքու էր ժամանել մասնակցելու ռուս-ադրբեջանական միջտարածաշրջանային համաժողովին։ Ալիևն ու Միշուստինը նախ հանդիպել են առանձին, ապա  երկու երկրների պատվիրակությունների մասնակցությամբ, գրում են ադրբեջանական լրատվամիջոցները։

Ալիևը, մասնավորապես, գոհունակություն է հայտնել է Ռուսաստանի հետ ապրանքաշրջանառության աճի առնչությամբ։ «Իհարկե, մենք շատ գոհ ենք, որ փոխադարձ առևտրի ծավալը հասնում է մինչհամաճարակային մակարդակին, և ես վստահ եմ, որ դինամիկան կշարունակվի»,-ասել է Ալիևը։ Նա նշել է, որ բեռնափոխադրումները ևս լավ դինամիկա են ցույց տալիս։

«Ինչ վերաբերում է տարանցիկ երթևեկությանը, ապա մենք ռեկորդային ցուցանիշի ենք հասնում»,- ասել է նա՝վստահեցնելով, որ այս ոլորտում համագործակցությունը կավելանա ինչպես երկկողմանի, այնպես էլ հարևան երկրների ներգրավմամբ։ «Տրանսպորտային միջանցքների, առաջին հերթին «Հյուսիս-Հարավ»-ի ներուժի ամրապնդումը կբխի բոլոր երկրների շահերից և լրացուցիչ հեռանկարներ կբացի»,- ասել է Ալիևը։

Նա նաև ուշադրություն է հրավիրել այն հանգամանքին, որ երկու երկրների նախագահները «նոր դինամիկա են հաղորդել հարաբերություններին»։

Հիշեցնենք, որ նա նախօրեին հեռախոսազրույց էր ՌԴ նախագահ Վլադիմիր Պուտինի հետ, որի ընթացքում քննարկվել էին համագործակցության հարցերը առևտրատնտեսական ու էներգետիկ ոլորտներում։

Էմմա Չոբանյան