21.04.2026 | 11:58
Նախատեսվում է ընդլայնել հայրենիքի պաշտպանության ժամանակ տուժած զինծառայողների և զոհվածների ընտանիքների սոցիալական երաշխիքները
Ալիևը դժգոհել է Նիկոլ Փաշինյանի հայտարարություններից
Քաղաքականություն
17.11.2022 | 18:17
Ադրբեջանի նախագահ Իլհամ Ալիևը, ըստ ամենայնի, բավական ծանր է տանում նախորդ շաբաթ ՀՀ Կառավարության նիստի ժամանակ վարչապետ Նիկոլ Փաշինյանի ելույթը, որով նա պատասխանում էր օկուպացված Շուշիից հենց Ալիևի ռազմատենչ հայտարարություններին։
Ալիևը, մասնավորապես, խաղաղության մասին Հայաստանի հայտարարությունները որակել է «մանիպուլյացիա»։ Պարբերաբար Հայաստանին և Արցախին սպառնացող Ալիևն անսպասելիորեն որոշել է դժգոհել Հայաստանի հռետորաբանությունից։
«Եթե այդ երկիրը (Հայաստանը) խաղաղություն է ուզում, պետք է հրաժարվի շատ վտանգավոր հռետորաբանությունից։ Վերջերս հայ պաշտոնյաները (վարչապետ Փաշինյանը) Ադրբեջանը համեմատեցին ԻԼԻՊ-ի և Ալ-Քաիդայի հետ։ Իմ կարծիքով՝ սա շատ վտանգավոր հռետորաբանություն է։ Նախ՝ իրենք են հանդես եկել որպես ԻԼԻՊ և Ալ-Քաիդա: Եվրամիության (երկրների) դեսպաններն այցելել են «ազատագրված ադրբեջանական տարածքներ»։ Հայերը պատմական ու կրոնական ժառանգությանը վերաբերվել են ԻԼԻՊ-ի և Ալ-Քաիդայի նման։ Նրանք են ահաբեկչական ակտեր են կատարել, նրանք են կատարել ցեղասպանություն։ Նրա՛նք, ոչ թե մենք»,- հայտարարել է Ալիևը՝ մի երկրի նախագահ, որը մի քանի օր առաջ զինվորական համազգեստով սպառնում էր Հայաստանի տարբեր բնակավայրերի քաղաքացիական բնակչությանը։
Ալիևը նման հայտարարություն է արել Արևելյան գործընկերության հարցերով ԵՄ հատուկ բանագնաց Դիրք Շյուբելի գլխավորած պատվիրակության հետ հանդիպմանը։
«Երբ Փաշինյանն արտասանում է նման խոսքեր, պետք է իմանա, որ մենք դա լսում ենք։ Նա պետք է մտածի, թե ինչպիսին կլինի մեր արձագանքը»,- ասել է Ալիևը՝ մոռանալով նշել, որ իր ամենօրյա ապսռնալիքներն Հայաստանում ու Արցախում նույնպես լսում են։
Ադրբեջանի ղեկավարը նաև նշել է, որ եթե Հայաստանը ցանկանում է խոսել Ղարաբաղի հայերի անվտանգության ու իրավունքների մասին, ապա ոչինչ չի ստացվի։
Էմմա Չոբանյան
