«Մենք պատրաստ ենք խոսել Ղարաբաղում ապրող հայերի, սակայն ոչ Մոսկվայից գործուղված Ռուբեն Վարդանյանի նման մարդկանց հետ»․ Ալիև

Ադրբեջանի նախագահ Իլհամ Ալիևը այսօր ընդունել է Արևելյան գործընկերության հարցերով Եվրամիության (ԵՄ) հատուկ բանագնաց Դիրք Շյուբելի գլխավորած պատվիրակությանը, որի ընթացքում կրկին հանդես է եկել հակահայկական հայտարարություններով։

«Եթե ​​ուզում են խոսել (Հայաստանը) Ղարաբաղում հայերի իրավունքների ու անվտանգության մասին, դա չի ստացվի, մենք պատրաստ ենք այդ մասին խոսել Ղարաբաղում ապրող հայերի հետ, բայց ոչ Մոսկվայից ուղարկված Վարդանյանի նման մարդկանց հետ, որի գրպաններում միլիարդներ են ռուս ժողովրդից գողացված։ Նա ուղարկվել է այնտեղ Մոսկվայից շատ հստակ օրակարգով։ Մենք պատրաստ ենք խոսել մարդկնաց հետ, որոնք ապրում են Ղարաբաղում ու ցանկանում են ապրել այնտեղ։ Մենք պատրաստ ենք դրան։ Այդ գործընթաը սկսվել է։ Եթե չլիներ միջամտություն արդեն իմ նշած երկրներից, որոնց մասին ես նշեցի և եթե չլիներ գործընթաց դադարեցնելու, կարծում եմ, գործընթացը կլիներ ավելի դինամիկ։ Սակայն դա կապ չունի Փաշինյանի ու նրա կառավարության հետ։  Ինչպես ես արդեն ասել եմ պետք է կոնսենսուս լինի Ադրբեջանի, Եվրամիության, ԱՄՆ-ի և Ռուսաստանի միջև, այսինքն՝ այն երկրների և կառույցների միջև, որոնք, Ադրբեջանի կարծիքով, կարող են աջակցել այդ աշխատանքին»,- ասել է Ալիևը։

Նա նաև նշել է, որ չի ընդունում Հայաստանի պահանջը Արցախի ժողովրդի իրավունքների ու անվտանգությանը հարցը խաղաղության պայմանագրում ներառելու։

«Ասում են՝ ճանաչում են մեր տարածքն ու ինքնիշխանությունը։ Ոչ միայն ասում են, այլ ստորագրում են Պրահայում և Սոչիում։ Սա նշանակում է մեր ողջ տարածքի ինքնիշխանությունը։ Մենք բոլորս հասկանում ենք, թե ինչ է ինքնիշխանությունը։ Միաժամանակ ցանկանում են հաշտության պայմանագրում ներառել Ադրբեջանում հայկական փոքրամասնությանը վերաբերող հարցեր։ Դա տեղի չի ունենա։ Դա անհնար է: Մենք սրան չենք համաձայնի։ Դրա համար մեզ անհրաժեշտ է Հայաստանի կառավարության հստակ դիրքորոշումը իր օրակարգի առնչությամբ»,-ասել է Ադրբեջանի՝ այդպես էլ չպատասխանելով Վաշինգտոնում ներկայացված Հայաստանի առաջարկներին։

Էմմա Չոբանյան