Հունաստանի արտգործնախարարը հրաժարվել է իջնել ինքնաթիռից Տրիպոլի ժամանելուց հետո և հեռացել

Լիբիայի ԱԳ նախարարությունը հայտնել է, որ Հունաստանի արտաքին գործերի նախարար Նիկոս Դենդիասը, որը պաշտոնական այցով ժամանել է այդ երկրի մայրաքաղաք Տրիպոլի, հրաժարվել է իջնել ինքնաթիռից և հետ է վերադարձել։ Նախարարը հայտարարել է, որ հավանություն է տվել Տրիպոլի Հունաստանի արտգործնախարարի այցին՝ «չնայած Լիբիայի ինքնիշխանության վերաբերյալ Աթենքի անհավասարակշիռ հայտարարություններին»։

Լիբիայի ազգային միասնության կառավարության արտաքին գործերի նախարար Նաջլա Մանկուշն անձամբ է սպասել նախարարին հինգշաբթի առավոտյան օդանավակայանում։ «Սակայն տեղի ունեցավ անսպասելի և վրդովվեցուցիչ մի բան. նախարարը հրաժարվեց իջնել ինքնաթիռից և վերադարձավ այնտեղ, որտեղից եկել էր՝ չբացատրելով պատճառները», – ասվում է արաբական երկրի ԱԳՆ հայտարարության մեջ, որը մեջբերում է ՌԻԱ Նովոստին։ Լիբիայի ԱԳՆ-ն նշել է, որ դատապարտում է նման պահվածքը և խոստացել է համապատասխան միջոցներ ձեռնարկել։

Սպասվում էր, որ հինգշաբթի օրը Դենդիասը կայցելի արևելյան Լիբիա, որտեղ նա բանակցություններ կվարի Ներկայացուցիչների պալատի նախագահ Ակիլա Սալեհի և լիբիացի այլ պաշտոնյաների հետ համագործակցության ամրապնդման շուրջ։ Ավելի վաղ Դենդիասը հայտարարել էր Հունաստանի և Լիբիայի միջև  տնտեսական գոտիները սահմանազատելու մտադրության մասին, հենց որ Լիբիայում ընտրված կառավարություն հայտնվի։

Բանն այն է, որ Հունաստանը չի ճանաչում Թուրքիայի ստորագրած համաձայնագիրը Տրիպոլիի կառավարության հետ։ 2019 թվականի նոյեմբերի վերջին Թուրքիայի նախագահ Թայիփ Էրդողանը և Լիբիայի Ազգային համաձայնության կառավարության ղեկավար Ֆայեզ Սարաջը, որը վերահսկում է երկրի միայն մի մասը, ստորագրել է ռազմական ոլորտում համագործակցության և ծովային փոխըմբռնման հուշագրեր։

Վերջինը դարձել է դիվանագիտական վեճերի պատճառ։ Թուրքիան հրապարակել է ծովային գոտիների քարտեզ՝ «հաշվի առնելով թուրք-լիբիական հուշագիրը», ըստ որի այն ջրերի զգալի մասը, որոնք Հունաստանը համարում է իր բացառիկ տնտեսական գոտին, անցնում են Թուրքիային։

Տաթև Ֆռանգյան