17.08.2026 | 23:08
Զորականում և Ամասիայում շչակներ են փորձարկվելու
Բաքուն Ֆրանսիայի գործերի հավատարմատարին կանչել է ԱԳՆ՝ ի նշան բողոքի
Քաղաքականություն
16.11.2022 | 18:54
Ադրբեջանում հակաֆրանսիական հիստերիան շարունակվում է։ Քարոզչական լրատվամիջոցների, պատգամավորների, փորձագետների հակաֆրանսիական հայտարարություններից հետո, Բաքուն ԱԳՆ է կանչել երկրում Ֆրանսիայի գործերի ժամանակավոր հավատարմատար Ժուլիեն Լը Լանին, որտեղ նրան բողոքի նոտա են հանձնել 2022 թվականի նոյեմբերի 15-ին Ֆրանսիայի Սենատում Ադրբեջանի դեմ ընդունված բանաձևի կապակցությամբ։
Նշվել է, որ Ֆրանսիայի Սենատում ընդունված բանաձևը հեռու է իրականությունից, այն «լի է ստերով ու զրպարտություններով և կտրականապես մերժվում է Ադրբեջանի կողմից»։
Ի դեպ այսօր Ադրբեջանի ԱԳՆ-ն նաև նմանատիպ հայտարարություն էր տարածել, որում ասվել է, որ բանաձևը սադրիչ բնույթ է կրում, միակողմանի է և լուրջ հարված է հասցնում խաղաղության հաստատման գործընթացին։
«Ադրբեջանական կողմը ևս մեկ անգամ համառորեն պահանջել է ֆրանսիական կողմից՝ զերծ մնալ միջազգային իրավունքով պաշտպանվող Ադրբեջանի տարածքային ամբողջականության և ինքնիշխանության դեմ ուղղված քայլերից ու հայտարարություններից և չմիջամտել նրա ներքին գործերին»,- ասվում է Ադրբեջանի ԱԳՆ հայտարարության մեջ։
Էմմա Չոբանյան
