07.06.2026 | 20:55
Ժամը 20:00-ի դրությամբ ընտրական հանցագործությունների վերաբերյալ նախաձեռնվել է 59 քրեական վարույթ․ ՔԿ
Հիմք չկա մտածելու, որ Ռուսաստանը հարձակում է պատրաստում ՆԱՏՕ-ի դեմ․ Ստոլտենբերգ
Քաղաքականություն
16.11.2022 | 17:59
ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ հիմք չկա մտածելու, թե Ռուսաստանը հարձակողական ռազմական գործողություններ է պատրաստում ՆԱՏՕ-ի դեմ, գրում է BBC-ի ռուսական ծառայությունը։
Ստոլտենբերգը նման հայտարարություն է արել Լեհաստանում տեղի ունեցած ողբերգական միջադեպի կապակցությամբ մամուլի ասուլիսի ժամանակ։ Նա ենթադրություն է հայտնել, որ Լեհաստան ընկած արկն արձակվել է ուկրաինական ՀՕՊ համակարգի կողմից։ Այսօր նույն կարծիքն է հայտնել նաև Լեհաստանի նախագահ Անջեյ Դուդան, իսկ նրանից առաջ՝ Մոսկվայի և Վաշինգտոնի ներկայացուցիչները։
ՆԱՏՕ-ի գլխավոր քարտուղարը, սակայն, վերապահում է արել, որ վերջնական եզրակացությունների համար պետք է սպասել անցկացված հետաքննության արդյունքներին։ Նա նշել է, որ եթե հրթիռն իսկապես ուկրաինական է, ՆԱՏՕ-ն Կիևին որևէ պահանջ չի ներկայացնի, քանի որ պատերազմը սկսել է Մոսկվան, իսկ Ուկրաինան միայն պաշտպանվում է ագրեսիայից։
«Ուկրաինայի մեղքը չէ, ի վերջո, Ռուսաստանն է պատասխանատու տեղի ունեցածի համար, որը շարունակում է անօրինական պատերազմ վարել Ուկրաինայի դեմ»,- ասել է Ստոլտենբերգը։
Նա նաև հայտնել է, որ Լեհաստանի նախաձեռնությամբ ՆԱՏՕ-ի երկրները մտադիր չեն գործի դնել Դաշինքի 4-րդ հոդվածը, որում նախատեսվում է արտաքին սպառնալիքին արձագանքելու մեխանիզմ։
Հավելենք, որ նախօրեին Լեհաստանի տարածք ընկած հրթիռի հետևանքով երկու մարդ է զոհվել։
Էմմա Չոբանյան
