Քաղաքականություն
16.11.2022 | 20:20
Ադրբեջանի Միլլի Մեջլիսի այսօրվա նիստը վերածվել է հակաֆրանսիական շոուի։ Ադրբեջանցի պատգամավորները, մեկը մյուսին հերթ չտալով, հանդես են եկել Փարիզի դեմ հայտարարություններով՝ պայմանավորված նախօրեին ֆրանսիական Սենատի կողմից ընդունված Հայաստանին աջակցող և Ադրբեջանին նկատմամբ պատժամիջոցներ պահանջող բանաձևին։
Բացի այդ, Մեջլիսը ֆրանսիական Սենատի բանաձևի հետ կապված հատուկ հայտարարություն է ընդունել։
Պատգավորները նաև ելույթներ են ունեցել։ Մասնավորապես, պատգամավոր Ֆազայիլ Աղամալին առաջարկել է հետ կանչել Փարիզում Ադրբեջանի դեսպանին։
«Ֆրանսիայի Սենատն անհեթեթ, կանխակալ դիրքորոշում է ցուցաբերում մեր նկատմամբ։ Ֆրանսիան հստակ ցույց է տալիս, որ աջակցում է Հայաստանին։ Այսօր Մակրոնն ու Ֆրանսիան նույնպես ազդում են ՅՈՒՆԵՍԿՕ-ի վրա և դիրքավորվում Ադրբեջանի դեմ։ Ադրբեջանի առաջին տիկին Մեհրիբան Ալիևան երեկ ՅՈՒՆԵՍԿՕ-ի պատմության մեջ աննախադեպ քայլի է դիմել։ Ես առաջարկում եմ վերանայել մեր հարաբերությունները Ֆրանսիայի հետ, հետ կանչել մեր դեսպանին։ Ֆրանսիայի հետ մեր դիվանագիտական հարաբերությունները շարունակելու իմաստ չկա»,- ասել է պատգամավորը։
Մեկ այլ պատգամավոր Թահիր Քերիմլին էլ առաջարկել է Ֆրանսիան ճանաչել թշնամական պետություն։
«Էլ ինչպիսի՞ն պիտի լինի թշնամին։ Գտնում եմ, որ Ֆրանսիան իսկական թշանմի է։ Դրա համար Ֆրանսիան պետք է ճանաչվի թշնամական պետություն։ Ֆրանսիան, որն իրեն անվանում է ժողովրդավարական պետություն, ոտնահարում է մեր իրավունքները։ Մենք պետք է զգոն լինենք և միասնական դիրքորոշում ունենանք։ Մենք պետք է ամրապնդենք դիվանագիտական և այլ կապերը նրանց հետ, որոնք դեմ են Ֆրանսիայի նենգ ծրագրերին»,- ասել է Քերիմլին։
Օրենսդիր Ռամին Մամեդովն էլ առաջարկել է լսումներ անցկացնել «ալժիրցիների ցեղասպանության կապակցությամբ»։
«Ֆրանսիան պատմության տարբեր ժամանակաշրջաններում տարբեր երկրներում իրագործված վայրագություններից հետո իրավունք չունի խոսել ռասայական խտրականության մասին։ Կարող է քննարկվել Ալժիրի ցեղասպանության հետ կապված Ադրբեջանի խորհրդարանում լսումներ անցկացնելու հարցը»,- ասել է Մամեդովը։
Էմմա Չոբանյան
