Տնտեսություն
16.11.2022 | 13:28Հայաստանը կհաղթահարի պետական պարտքի պարտավորությունների սպասարկումը, ֆինանսական պարտավորությունների կատարումը հետաձգելու համար Արժույթի միջազգային հիմնադրամին դիմելու պատճառ չկա։ Այս մասին խորհրդարանում հայտարարեց Ֆինանսաների նախարար Տիգրան Խաչատրյանը՝ 2023 թ. բյուջեի քննարկման ժամանակ։
Նշենք, որ Արժույթի միջազգային հիմնադրամն իր վերջին զեկույցում համաշխարհային տնտեսության համար կանխատեսել է ընդամենը 2.6 տոկոս աճ։
«Մենք չենք տեսնում որևէ պատճառ, թե ինչու պետք է դիմենք միջազգային ֆինանսական կառույցներին` մեր պարտքային պարտավորությունները սպասարկելու պայմանները մեղմելու համար։ Մեր բոլոր հաշվարկները ցույց են տալիս, որ գտնվում ենք բավականին հուսալի միջակայքում, և մեր քաղաքականությունը թույլ է տալիս մեր ստանձնած պարտավորությունները կատարել ժամանակին և ամբողջությամբ։ Դա մեր պլանների մեջ չի մտնում»,- նշեց նախարարը։
Խաչատրյանի դիտարկմամբ՝ ամբողջ աշխարհում իրավիճակը բարդանում է՝ հատկապես կապված էներգակիրների շուկաներում փոխհարաբերությունների հետ։
«Բայց այն գործոնները, որոնք աշխարհում առաջացրել են անորոշություններ և որոշ դեպքերում բացասաբար են ազդել, մեր տնտեսության վրա զգալի դրական ազդեցություն են ունեցել։ Ինչու․ որովհետև բազմաթիվ մարդիկ նախընտրել են ապրել և տնտեսական գործունեությունը վարել ՀՀ-ում, ինչը լրացուցիչ ազդակ է տվել տնտեսական ակտիվությանը»,- նշեց նախարարը։
Մանրամասները՝ տեսանյութում։
