«Կեղծիք է, զրպարտություն և սադրանք»․ Բաքվի հիստերիան Ֆրանսիայի Սենատի կողմից հակաադրբեջանական բանաձևի ընդունման կապակցությամբ

Ադրբեջանի ԱԳՆ-ն արձագանքել է Ֆրանսիայի Սենատի կողմից նախօրեին ընդունված՝ Հայաստանին աջակցող և Ադրբեջանի նկատմամբ պատժամիջոցներ առաջարկող բանաձևին, ինչպես սովորաբար՝ հիստերիայով։

Մասնավորապես, Ադրբեջանի ԱԳՆ-ն նշում է, որ «բանաձևը հեռու է իրականությունից, արտացոլում է կեղծ և զրպարտչական դիրքորոշումներ, կրում է բացահայտ սադրիչ բնույթ և ծառայում է Հայաստանի ու Ադրբեջանի միջև հարաբերությունների կարգավորման գործընթացի խարխլմանը»։

«Սենատի կողմից ընդունված և իրավական ուժ չունեցող այս բանաձևն ակնհայտորեն ցույց է տալիս Ֆրանսիայի կողմնակալ և միակողմանի քաղաքական դիրքորոշումը՝ որպես երկրի, որը հայտարարել է խաղաղ գործընթացին նպաստելու մտադրության մասին։ Ընդհանուր առմամբ, բանաձևում նշված բոլոր անհեթեթ պնդումները ցույց են տալիս, որ դրա հեղինակները տեղյակ չեն պատմական փաստերին և տարածաշրջանում տիրող իրավիճակին»,- ասվում է հայտարարության մեջ։

Բաքուն, ավանդույթի համաձայն, Հայաստանի հասցեին անհիմն մեղադրանքներ է հնչեցրել և բորբոքվել «Լեռնային Ղարաբաղ» տերմինի օգտագործումից։

«Ինչ վերաբերում է բանաձևում, այսպես կոչված, Լեռնային Ղարաբաղ կոչվող կազմավորման մասին անհեթեթ պատկերացումներին, ապա մենք ևս մեկ անգամ հիշեցնում ենք սենատորներին, որ Ղարաբաղի տարածաշրջանը, որը հանդիսանում է Ադրբեջանի միջազգայնորեն ճանաչված տարածքը, հանդիսանում է Ադրբեջանի անբաժանելի մասը։ Այս տարածաշրջանում ապրող հայ բնակչության իրավունքներն ու անվտանգությունն Ադրբեջանի ներքին գործն են, և դրանք ապահովվելու են Ադրբեջանի Սահմանադրության համաձայն»,- ասվում է հայտարարության մեջ։

Բաքուն նշել է, որ «կտրականապես մերժում է Ֆրանսիայի Սենատի ընդունած հերթական բանաձևը»։

Էմմա Չոբանյան