Թուրքիայի իշխանամետ մամուլը երկրի ընդդիմադիր առաջնորդին է մեղադրել Ստամբուլի պայթյունի մեջ

Թուրքիայի կառավարամետ Yeni Akit պարբերականը երկրի գլխավոր ընդդիմադիր Ժողովրդահանրապետական կուսակցության առաջնորդ Քեմալ Քըլըչդարօղլուին է մեղադրել Ստամբուլի Իսթիքլալ պողոտայում տեղի ունեցած պայթյունի համար, որի հետևանքով զոհվել է առնվազն 6 մարդ, վիրավորվել՝ 81-ը, գրում է Duvar-ը։

«Ես նորից կրկնում եմ՝ սպասեք նոյեմբերին, սպասեք պարոն Քեմալին»,- հոկտեմբերի 18-ին Թվիթերում գրել էր Քըլըչդարօղլուն՝ ակնարկելով, որ արագացնելու է նախընտրական քարոզարշավը։

Տեղի ունեցած պայթյունից մի քանի ժամ անց էլ Yeni Akit-ն իր հրապարակման մեջ մատնանշել է Քըլըչդարօղլուի թվիթը և գրել․ «Սոցիալական ցանցերի օգտատերերը մեկնաբանել են՝ արդյո՞ք Քըլըչդարօղլուն նկատի ուներ պայթյունը, երբ ասում էր նոյեմբեր»։

Քըլըչդարօղլուի փաստաբան Ջելալ Չելիքն ասել է, որ լրատվամիջոցի դեմ քրեական գործ են հարուցելու։

Հիշեցնենք, որ նոյեմբերի 13-ին Ստամբուլի կենտրոնական Իսթիքլալ պողոտայում պայթյուն էր որոտացել, որի հետևանքով զոհվել է առնվազն 6 մարդ, վիրավորվել՝ 81-ը: Թուրքիայի ներքին գործերի նախարար Սուլեյման Սոյլուն պայթյունի համար մեղադրել է քրդական YPG-ին և Քուրդիստանի աշխատավորական կուսակցությանը (PKK): Անկարան պնդում է, որ YPG-ն, որին Վաշինգտոնն աջակցում է Սիրիայում, PKK-ի թևն է:

Թուրքիայի ոստիկանությունը պայթյունի իրականացման համար ձերբակալել է սիրիացի կնոջ, որին մեղադրում է PKK-ի կապերի մեջ։ PKK-ն, սակայն, հերքել է իր ներգրավվածությունը պայթյունին՝ նշելով, որ չի թիրախավորում քաղաքացիական անձանց։

Էմմա Չոբանյան