Ուկրաինայում կատաղի մարտերը կշարունակվեն․ Պենտագոնի ներկայացուցիչ

Ուկրաինացի զինվորականները շարունակում են զարգացնել ձեռքբերումները և այժմ վերացնում են խոչընդոտներն ու մաքրում Խերսոնում ռուսների թողած ականները։ Այս մասին ասել է ԱՄՆ բարձրաստիճան զինվորականը, գրում է VOA-ն:

Ուկրաինայի իշխանությունները գնահատում են մեկնելուց առաջ ռուս օկուպանտների հասցրած վնասը։ Պաշտոնյայի խոսքով՝ կան նշաններ, որ Ռուսաստանը զգալի վնաս է հասցրել Խերսոնում քաղաքացիական ենթակառուցվածքներին, այդ թվում՝ ջրամատակարարման և այլ կոմունալ համակարգերին։

«Ռուսները, ըստ երևույթին, չեն հեռանում Ուկրաինայի մնացած օկուպացված տարածքից և, անկասկած, առջևում կլինեն կատաղի մարտեր։ Այնուամենայնիվ, Խերսոնի ազատագրումը մեծ ձեռքբերում է և վկայում է ուկրաինացի ժողովրդի ու նրա Զինված ուժերի տոկունության, վճռականության և հաստատակամության մասին, ովքեր մարտերում պաշտպանում են իրենց երկիրը»,- ասել է Պենտագոնի պաշտոնյան՝ անանուն մնալու պայմանով:

Հնարավոր է, որ Ուկրաինայում մարտերը կդանդաղեն ձմռան մոտենալուն զուգահեռ, սակայն, պաշտոնյայի խոսքով, սա չի նշանակում ԱՄՆ-ի ծրագրած աջակցության դանդաղում, քանի որ դա կախված է ոչ թե եղանակից, այլ ուկրաինական կողմի կարիքներից։

«Մենք կշարունակենք աշխատել նրանց հետ մեր միջազգային դաշնակիցների և գործընկերների հետ միասին՝ ապահովելու, որ նրանք ստանան այն, ինչ անհրաժեշտ է մարտի դաշտում հաջողության հասնելու համար։ Մենք պատրաստ ենք դա անել այնքան ժամանակ, որքան կպահանջվի»,- ասել է պաշտոնյան:

Աղբյուրի փոխանցմամբ՝ նախարարությունը հոկտեմբերի վերջից նկատում է ռուսական հրթիռների և անօդաչու թռչող սարքերի հարվածների ինտենսիվության մի փոքր նվազում, սակայն Ռուսաստանը շարունակում է հարվածներ հասցնել քաղաքացիական ենթակառուցվածքներին, ներառյալ՝ էլեկտրացանցերին:

Տաթև Ֆռանգյան