13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
ԵՄ-ում 2014թ․ ի վեր գրանցվել է Թուրքիայից ապաստանի դիմումների ամենաբարձր ամսական ցուցանիշը
Քաղաքականություն
11.11.2022 | 23:25
Թուրքիայի քաղաքացիներն օգոստոսին ԵՄ-ում ապաստանի 4․600 դիմում են ներկայացրել, ինչն ամսական կտրվածքով ամենաբարձր ցուցանիշն է 2014 թվականից ի վեր: Այս մասին հաղորդում է DW-ի թուրքական ծառայությունը՝ վկայակոչելով Եվրամիության ապաստանի գործակալության (EUAA) հրապարակած վերլուծությունը, գրում է Turkish Minute-ը։
Նշվում է, որ ԵՄ ապաստանի դիմումները, որոնք ներառում են անդամ 27 երկրները՝ գումարած Նորվեգիան ու Շվեյցարիան, օգոստոսին հասել են 84,500-ի, ինչը նոր բարձր ցուցանիշ է 2015-2016 թվականների փախստականների ճգնաժամից ի վեր՝ ըստ EUAA-ի տվյալների։ Սա ցույց է տալիս, որ թուրքերը երրորդ ամենամեծ դիմումատու խումբ են՝ աֆղաններից (12,100 դիմում) և սիրիացիներից (11,900 դիմում) հետո։
Անկախ ամսական որոշ տատանումներից՝ թուրքական դիմումները 2022 թվականի սկզբից ի վեր աճի միտում են գրանցել։ Գործակալությունը նշում է, որ օգոստոսին ԵՄ-ում ապաստան հայցած թուրք դիմողների 94 տոկոսը, այդ թվում՝ առանց ուղեկցող անչափահասների՝ 1 տոկոսը, դա արել են առաջին անգամ:
Թուրք դիմորդների ճանաչման մակարդակը տարեսկզբից անկում է ապրել և օգոստոսին է՛լ ավելի է իջել՝ մինչև 36 տոկոս, որն ամենացածրն է ավելի քան երկու տարվա ընթացքում, վկայում են տվյալները: Այնուամենայնիվ, թուրքերը շարունակում են գրեթե բացառապես փախստականի կարգավիճակ ստանալ. փախստականի կարգավիճակ շնորհող դրական որոշումների մասնաբաժինը (ամենաբարձրերից մեկն է եղել բոլոր քաղաքացիությունների մեջ։
Գերմանիայում ևս թուրքերի աճող դիմումների թիվն ուշադրություն է գրավում։ 2022 թվականի հունվար-հոկտեմբեր ամիսներին այդ ցուցանիշը կազմել է 15,957՝ նախորդ տարվա նույն ժամանակահատվածի համեմատ 175,7 տոկոսով ավելի։
Տարեսկզբից ԵՄ երկրները ստացել են ապաստանի ընդհանուր շուրջ 564,000 դիմում, ինչը 62 տոկոսով ավելի է 2021 թվականի նույն ժամանակահատվածի համեմատ։
Հավելենք, որ հազարավոր թուրքեր ստիպված են եղել լքել Թուրքիան 2016 թվականի հուլիսին հեղաշրջման փորձից հետո, որից հետո իշխող «Արդարություն և զարգացում» կուսակցությունը լայնածավալ ճնշումներ է սկսել ոչ հավատարիմ քաղաքացիների նկատմամբ՝ հակահեղաշրջման պայքարի պատրվակով:
Էմմա Չոբանյան
