09.10.2026 | 13:43
Մեսիի հրաժեշտի հանդիպումը դիտել է 3,5 միլիարդ մարդ
Եվրախորհրդարանը հավանություն է տվել Շենգենյան գոտի Խորվաթիայի մուտքին
Քաղաքականություն
10.11.2022 | 19:53
Եվրախորհրդարանը հավանություն է տվել Շենգենյան ազատ տեղաշարժի գոտու և Խորվաթիայի միջև ներքին սահմանային հսկողության վերացմանը։ Երկիրը Շենգենյան գոտի կմտնի մինչև տարեվերջ։ Այս մասին ասվում է խորհրդարանի կայքում հրապարակված հաղորդագրությունում։
Նշվում է, որ Խորվաթիան անցել է ԵՄ բոլոր երկրների շարքում Շենգենյան գոտուն անդամակցության ամենաընդգրկուն գնահատականը։ Այն իրականացրել է 281 հանձնարարական Շենգենյան օրենսդրության ութ ոլորտներում։ Եվրահանձնաժողովը և Եվրոպական խորհուրդը հաստատել են Շենգենյան կանոններն ամբողջությամբ կիրառելու՝ երկրի պատրաստակամությունը։ Ներքին վերահսկողության վերացման վերաբերյալ վերջնական որոշումը պետք է ընդունվի Եվրոպական խորհրդի կողմից միաձայն։
2018 թվականին Եվրախորհրդարանի պատգամավորները հայտարարել են, որ Խորվաթիան պետք է ընդունվի Շենգենյան տարածք, երբ համապատասխանի անհրաժեշտ չափանիշներին։ 2022 թվականի հոկտեմբերին նրանք նաև աջակցություն են հայտնել Շենգենյան տարածք Բուլղարիայի և Ռումինիայի անհապաղ ընդունմանը։
Շենգենյան ազատ տեղաշարժի գոտին այսօր ներառում է 26 պետություն (ԵՄ բոլոր անդամ երկրները՝ բացառությամբ Բուլղարիայի, Խորվաթիայի, Կիպրոսի, Իռլանդիայի և Ռումինիայի, ինչպես նաև ԵՄ անդամ չհանդիսացող երկրները՝ Նորվեգիան, Իսլանդիան, Շվեյցարիան և Լիխտենշտեյնը):
Հիշեցնենք, որ ԵՄ-ն որոշել է արագացնել Շենգենյան գոտու ընդլայնման գործընթացը։
Գերմանիայի կանցլեր Օլաֆ Շոլցի խոսքով՝ Խորվաթիան, Ռումինիան և Բուլղարիան լիովին համապատասխանում են Շենգենյան գոտու լիիրավ անդամներ դառնալու պահանջներին։
Տաթև Ֆռանգյան
