27.02.2026 | 10:35
Ինչ է փոխվում հայտարարագրման համակարգում․ ՈՒՂԻՂ
Վլադիմիր Գասպարյանի դուստրը և նախկին պատգամավոր փեսան հրավիրվել են Գլխավոր դատախազություն՝ ապօրինի ծագման գույքի գործով
Հասարակություն
09.11.2022 | 20:50
ՀՀ Գլխավոր դատախազության ապօրինի ծագում ունեցող գույքի բռնագանձման գործերով վարչությունում Ազգային ժողովի նախկին պատգամավոր Արթուր Գևորգյանին և ՀՀ նախկին ոստիկանապետ Վլադիմիր Գասպարյանի դստերը՝ Աննա Գասպարյանին պատկանող գույքի առնչությամբ իրականացվում է ուսումնասիրություն: Այս մասին Factor.am-ը տեղեկանում է «Ազդարար» պաշտոնական հայտարարությունների հարթակից։
Նախկին պատգամավորին ու նրա կնոջը Դատախազությունը մեկ ամիս ժամանակ է տվել, որ ներկայանան վարչություն, ծանոթանան գործի նյութերին և դիրքորոշում հայտնեն։ Ըստ այդմ, Գևորգյանը և Գասպարյանը Ապօրինի ծագում ունեցող գույքի բռնագանձման գործերով վարչություն պետք է ներկայանան նոյեմբերի 18-ին։
Այս փուլում Գլխավոր դատախազությունը չի բացահայտում, թե խոսքը ո՞ր գույքին է վերաբերում՝ պատճառաբանելով, թե շահագրգիռ անձանց բացատրությունների հիման վրա կարող է փոփոխվել գույքի շրջանակը, այդ պատճառով նպատակահարմար չեն համարում մատնանշել բռնագանձվող գույքի կազմը:
Հիշեցնենք՝ Գլխավոր դատախազությունը Վլադիմիր Գասպարյանի ու նրա ընտանիքի անդամների դեմ ապօրինի ծագում ունեցող գույքի բռնագանձման պահանջով 2021թ. նոյեմբերին հայցադիմում էր ներկայացրել Երևան քաղաքի ընդհանուր իրավասության դատարան: Նախկին ոստիկանապետն իր հերթին հայց էր ներկայացրել Դատախազության դեմ՝ ուսումնասիրության արդյունքների վերջնական ամփոփման վերաբերյալ եզրակացությունն անվավեր ճանաչելու պահանջով, սակայն դատարանը մերժել էր հակընդդեմ հայցադիմումի ընդունումը:
Դատարանն այս տարվա օգոստոսի 31-ին որոշում է կայացրել քաղաքացիական գործը հանձնել Հակակոռուպցիոն դատարանի քննությանը:
Ռոզա Վարդանյան
