16.04.2026 | 11:37
ԱԺ ճեպազրույցները՝ ՈՒՂԻՂ
Սպեկուլյացիա է․ ԱՄՆ-ն չի՛ ասում՝ Ադրբեջանի դրոշ դրվի ԼՂ-ում, Ալիևի հրահանգը կատարի Ստեփանակերտը․ Արցախն է որոշելու․ Էդգար Վարդանյան. ՏԵՍԱՆՅՈՒԹ
Քաղաքականություն
08.11.2022 | 21:02
«Առանց ԱՄՆ-ի ճնշման հարց չի լուծվում ՀՀ-Ադրբեջան պրոցեսում։ Մենք տեսնում ենք, որ ՌԴ-ն իր հերթին համաձայնվում է արևմտյան տիրույթում կայացված որոշումներին»,- Factor TV-ին տված հարցազրույցում պնդում է քաղաքագետ Էդգար Ղազարյանը՝ մեկնաբանելով ԱՄՆ-ում և ՌԴ-ում կայացած Հայաստան-Ադրբեջան բարձր և բարձրագույն մակարդակով հանդիպումների արդյունքները։
Վաշինգտոնում հանդիպեցին և բանակցեցին Հայաստանի և Ադրբեջանի արտգործնախարարներ Արարատ Միրզոյանը և Ջեյհուն Բայրամովը։ Ըստ ՀՀ ԱԳՆ-ի՝ արտգործնախարարները մտքեր են փոխանակել հավանական խաղաղության պայմանագրի տարրերի վերաբերյալ և արձանագրել, որ առկա են մի շարք խնդիրներ, որոնք դեռևս հասցեագրման կարիք ունեն։ Եվս մեկ հանդիպում կանցկացնեն առաջիկա շաբաթներին։ Այս հանդիպումը կայացավ Սոչիում Փաշինյան-Ալիև-Պուտին հանդիպումից գրեթե մեկ շաբաթ հետո, երբ, հիշում ենք, Պուտինին չէր հաջողվել Ադրբեջանին համոզել ԼՂ-ի կարգավիճակի որոշման հետաձգման և ռուս խաղաղապահների մնալու ժամկետի երկարաձգման հարցերում։ Ալիևն ուղիղ ասաց Պուտինին, որ ինքը զենքով լուծել է ղարաբաղյան կոնֆլիկտը և այդ մասին խոսելիք չունի։
Ալիևի ոչ կառուցողական կեցվածքը, ըստ քաղաքագետի, կարող է շրջվել իր իսկ դեմ, երբ նա չի ընդունում ո՛չ ՌԴ-ի ծրագիրը, ո՛չ ԱՄՆ-ինը․ «Ուժի կիրառման սկզբունքն աննախադեպ արդյունքի է հասել միջազգային հարաբերություններում։ Ադրբեջանը ռազմական հաջողություն է գրանցել և ուզում է կապիտալիզացնել այն։ Եվ այդ փաստն օգտագործում է՝ ասելով՝ ԼՂ-ն ճանաչել եք իմ տարածք, բարի եղեք՝ հաշվի առեք իմ կամքը, եթե խաղաղություն եք ուզում։ Նրա թիկունքում Թուրքիան է, որի դերը մեծացել է, քանի որ ՌԴ-ի հետ և՛ մրցակցում է, և՛ գործակցում է, ըստ այդմ էլ՝ Բաքուն պաշտպանում է իր մաքսիմալիզմը»։
Սակայն միջազգային հանրությունը կարող է երկար չհանդուրժել այս կեցվածքը, և ըստ Էդգար Վարդանյանի՝ միանգամայն իրատեսական է Ալիևի ռեժիմի դեմ պատժամիջոցների կիրառումն ԱՄՆ-ի կողմից՝ հարկադրելու ընդունել միջազգային մեխանիզմների ներդրման իր առաջարկը։ Քաղաքագետը սպեկուլյացիա է որակում այն պնդումները, թե ԱՄՆ-ն առաջարկում է Ադրբեջանի սուվերենությունը տարածել ԼՂ-ի վրա, ասենք՝ Ստեփանակերտում ադրբեջանական դրոշ դնելով կամ ստիպելով ԼՂ-ին՝ կատարել Ալիևի հրահանգները։ Դրանք սպեկուլյացիաներ են, և քաղաքագետը վստահ է, որ ԼՂ-ն է որոշելու բազմաթիվ կարևոր հարցեր։
Հարցազրույցն ամբողջությամբ՝ տեսանյութում։
Ռոբերտ Անանյան
