31.10.2026 | 22:55
Հայտնաբերվել է զինծառայողի դի. ՊՆ
Կիևի քաղաքապետը քաղաքացիներին հորդորել է պատրաստվել առանց էլեկտրականության ձմռան
Քաղաքականություն
08.11.2022 | 15:09
Կիևի քաղաքապետ Վիտալի Կլիչկոն զգուշացրել է բնակիչներին, որ այս ձմռանը պետք է պատրաստ լինել վատթարագույնին, եթե Ռուսաստանը շարունակի հարվածներ հասցնել երկրի էներգետիկ ենթակառուցվածքին, ինչը նշանակում է, որ ցրտաշունչ եղանակին կարող է լինել էլեկտրաէներգիայի, ջրի և ջեռուցման խնդիր, գրում է VOA-ն:
«Մենք ամեն ինչ անում ենք, որպեսզի խուսափենք դրանից: Բայց եկեք անկեղծ լինենք, մեր թշնամիներն ամեն ինչ անում են, որ քաղաքը մնա առանց ջերմության, լույսի, ջրամատակարարման, որ ընդհանրապես բոլորս մահանանք։ Երկրի և մեզանից յուրաքանչյուրի ապագան կախված է նրանից, թե ինչպես ենք մենք պատրաստվելու տարբեր իրավիճակներին»,- ասել է Կլիչկոն։
Ուկրաինայի նախագահ Վլադիմիր Զելենսկին էլ ավելի վաղ տեսաուղերձում ասել էր, որ շուրջ 4,5 միլիոն մարդ մնացել է առանց էլեկտրականության։ Նա հորդորել է հայրենակիցներին հաղթահարել դժվարությունները, որպեսզի «հաղթահարեն այս ձմեռը և գարնանն ավելի ուժեղ դառնան, քան հիմա»։
Կիրակի Կիևում և նրա շրջակայքում հովհարային հոսանքազրկումներ են իրականացվել։
Ուկրաինայի պետական էներգետիկ «Ուկրէներգո» ընկերությունը հայտնել է, որ նման անջատումներ են նախատեսվում նաև Չեռնիգովի, Չերկասի, Ժիտոմիրի, Սումիի, Խարկովի և Պոլտավայի շրջաններում։
Տաթև Ֆռանգյան
