Քաղաքականություն
04.11.2022 | 23:04
«Ադրբեջանի քաղբանտարկյալների ազատության միությունը» նոյեմբերի 4-ին հրապարակել է երկրում քաղբանտարկյալների թարմացված ցուցակը, գրում են տեղական լրատվամիջոցները։
Այն կազմվել է Խաղաղության ու ժողովրդավարության ինստիտուտի տնօրեն Լեյլա Յունուսի ու Քաղբանտարկայլների մոնիթորինգի կենտրոնի ղեկավար Էլշան Հասանովի կողմից։ Թարմացված ցուցակում կա 100 անուն։ Նախորդ ցուցակը հրապարակվել էր սեպտեմբերի 28-ին, որը ներառում էր 99 անուն։
Էլշան Հասանովը հայտնել է, որ ցուցակում հայտնվել են նոր դեմքեր՝ Demokratik.az կայքի ղեկավար Օսման Նարիմանօղլուն և կրոնական երգերի կատարող Վուգար Ռասուլը։ Նարիմանօղլուն ձերբակալվել է 2022 թվականի հուլիսի 5-ին Մելիորացիայի վարչության պաշտոնյաներից և Գերանբոյ ու Գյոյգոլ շրջանների բժիշկներից շորթման մեղադրանքով։ Ձերբակալումից հետո լրագրողը հայտնել է, որ մեղադրանքները կեղծ են, իրեն զրպարտել են նրանք, ում կոռուպցիայի մասին նա նյութեր է հրապարակել։ Նարիմանօղլուն պնդում է, որ մեղադրող կողմը շորթման ապացույցներ չունի։
Վուգար Ռասուլն էլ ձերբակալվել է 2022-ի հուլիսի 18-ին՝ թմրամիջոցների ապօրինի շրջանառության մեղադրանքով։ Ըստ իրավապաշտպանների՝ նրա ընտանիքին գտնվելու վայրի և մեղադրանքի մասին հայտնել են միայն 2022 թվականի հուլիսի 22-ին։ Ռասուլը ևս հերքում է մեղադրանքները։ Իրավապաշտպանները կարծում են, որ ձերբակալման իրական պատճառը Ռասուլի կողմից կրոնական բողոքի երգերի կատարումն էր։
Քաղբանտարկյալները բաժանվում են 7 խմբի․ 1-ին խումբ՝ լրագրողեր ու բլոգերներ (6 մարդ), 2-րդ խումբ՝ ընդդիմադիր կուսակցությունների ու շարժումների անդամներ (4 մարդ), 3-րդ խումբ՝ Գերմանիայից արտաքսված քաղաքական էմիգրանտներ (5 մարդ), 4-րդ խումբ՝ հավատացյալներ (18 մարդ), 5-րդ խումբ՝ Տերտերի գործով դատապարտվածներ (27 մարդ), 6-րդ խումբ՝ Գյանջայի գործով դատապարտվածներ (27 մարդ), 7-րդ խումբ՝ ցմահ դատապարտյալներ (13 մարդ)։
Էմմա Չոբանյան
