Հարուցվել է քրեական վարույթ․ Գյումրիի Ավետիք Իսահակյանի տուն-թանգարանում վերանորոգման աշխատանքները կատարվել են առանց թույլտվության

Գյումրիում հանրապետական նշանակության, օտարման ոչ ենթակա հուշարձան համարվող «Ավետիք Իսահակյանի տուն-թանգարանում» կոսմետիկ վերանորոգման աշխատանքները կատարվել են առանց ԿԳՄՍՆ-ի, Գյումրու համայնքապետարանի և ճարտարապետական խորհրդի թույլտվությունների և առանց կապալառու կազմակերպությունների հետ պայմանագրի կնքման։

Այս հիմքով ՀՀ քննչական կոմիտեի Շիրակի մարզային վարչությունում հարուցվել է քրեական վարույթ՝ ՀՀ Քրեական օրենսգրքի 301 հոդվածի 1-ին մասի հատկանիշներով (Պետության պահպանության տակ գտնվող պատմության կամ մշակույթի հուշարձանը, ինչպես նաև պատմական կամ մշակութային առանձնակի արժեք ունեցող առարկան կամ փաստաթուղթը ոչնչացնելը կամ վնասելը՝ պատժվում է տուգանքով` տասնապատիկից երեսնապատիկի չափով, կամ հանրային աշխատանքներով՝ հարյուրից երկու հարյուր ժամ տևողությամբ, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ` առավելագույնը երեք տարի ժամկետով):

Հիշեցնենք, որ տևական ժամանակ է՝ թանգարանի շուրջ կրքերը չեն հանդարտվում ավագանու անդամներից մի քանիսը պնդում են, որ շինաշխատանքներն առանց համապատասխան թույլտվության են և որ սրահների միջսենյակային դռները իրավունք չկար հանելու։ Մեզ հետ զրույցումը նույնը պնդել էր նաև Գյումրու գլխավոր ճարտարապետ Հենրիկ Գասպարյանը։

Կոսմետիկ վերանորոգման աշխատանքները, որոնց գումարը 700 հազար դրամ է, հատկացվել է Գյումրու համայնքային բյուջեից, ԿԳՄՍ նախարարությունն էլ 2 միլիոն 300 հազար դրամի դրամաշնորհ է հատկացրել՝ ցուցանմուշների և ցուցադրության փոփոխության համար։

Արմիկ Մովսիսյան