Ուժայինները բացահայտ հակամարտում են Պուտինի հետ․ ISW

Պատերազմի ուսումնասիրության ամերիկյան ինստիտուտը (ISW) Ուկրաինայի պատերազմի վերաբերյալ իր վերջին վերլուծության մեջ ուշադրություն է հրավիրում ՌԴ նախագահ Վլադիմիր Պուտինի և ուժային պաշտոնյաների միջև շարունակվող բաց հակամարտության ուղղությամբ, որոնք քննադատում են նրա գործողություններն Ուկրաինայում, գրում է BBC-ի ռուսական ծառայությունը։

Նշվում է, որ նման բաց հակադրությունը ցույց է տալիս, որ ուժային կառույցների որոշակի ներկայացուցիչներ ունեն ազդեցություն ռուսական քաղաքականության մեջ և կուրորեն Պուտինին չեն ենթարկվում, ինչպես ավելի վաղ ենթադրվում էր։

Ինստիտուտի վերլուծաբանների կարծիքով՝ ստեղծված իրավիճակում ՌԴ նախագահը փորձելու է բոլոր ուժերով բավարարել պատերազմի կողմնակիցների ախորժակը։

Հատուկ ուշադրություն է դարձվում Եվգենի Պրիգոժինի անձին ու նրա մեծ ազդեցությանը։ Նա զբաղեցնում է եզակի դիրք, որը թույլ է տալիս նրան կապիտալիզացնել Պուտինի կախվածությունը ստեղծված «Վագների խմբից»՝ չկրելով պաշտոնական պատասխանատվություն Ուկրաինայում կանոնավոր բանակի սխալների համար։ Նրա ազդեցությունը ռուսական տեղեկատվական տարածքում նույնպես արագորեն աճում է՝ բազմաթիվ հարթակներում և մեծ թվով բաժանորդներով։ Պուտինի ռեժիմը, փորձագետների կարծիքով, մեծապես կախված է տեղեկատվական տարածքում Կրեմլի մենաշնորհից, և Պրիգոժինն ավելի ու ավելի է մարտահրավեր նետում այդ մենաշնորհին:

Բացի այդ, «ռուս ուղղափառ ժողովրդի արդար գործի համար պայքարի» մասին պաթոսի ֆոնին Ռուսաստանի ղեկավարությունը նաև կարիք զգաց ռուսական բանակի շարքերում կրոնական և էթնիկ փոքրամասնություններին բացատրելու իրենց դերն այս պատերազմում։ Դրա համար, ըստ ինստիտուտի, խաղարկվում է «ուկրաինական սատանիզմի դեմ պայքարի» քարտը, որը նույնապես կարևոր է ինչպես քրիտոնյաների, այնպես էլ մահմեդականների ու այլ կրոնների ներկայացուցիչներ համար։ Նման հայտարարություններով հանդես են եկել ՌԴ Անվտանգության խորհրդի քարտուղարի օգնական Ալեքսեյ Պավլովը և Չեչնիայի ղեկավար Ռամզան Կադիրովը։

Էմմա Չոբանյան