30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Հայաստանն ու Ադրբեջանն են որոշում՝ Պուտինի հրավերն օգտակա՞ր է, թե ոչ․ԱՄՆ Պետքարտուղարություն
Քաղաքականություն
26.10.2022 | 12:23
ԱՄՆ Պետքարտուղարության խոսնակ Նեդ Փրայսը նախօրեին ճեպացրույցում անդրադարձել է Հայաստանի ու Ադրբեջանի միջև խաղաղության գործընթացին։ Լրագրողներից մեկը, անդրադառնալով ՌԴ ԱԳՆ պաշտոնական ներկայացուցիչ Մարիա Զախարովային հայտարարությանը, ուշադրություն է հրավիրել այն փաստի վրա, որ Կրեմլը մեղադրում է Արևմուտքին ինքնագովազդ անելու, Հարավային Կովկասից Ռուսաստանին դուրս մղելու փորձերի մեջ՝ ակնարկելով արևմտյան պաշտոնյաների հաճախակի այցերը Հայաստան և Բաքվի ու Երևանի հարաբերությունների կարգավորման հարցում նախաձեռնությունները։ Ըստ լրագրողի՝ այս ամենը տեղի է ունենում այն ժամանակ, երբ ՌԴ նախագահ Պուտինը փորձում է մինչև այս ամսվա վերջ հանդիպում կազմակերպել Հայաստանի և Ադրբեջանի առաջնորդների միջև։ Լրագրողը փորձել է ճշտել՝ արդյո՞ք ԱՄՆ-ն մտահոգված չէ, որ այդ հանդիպումը կարող է նպաստել ոչ թե Բրյուսելի և Պրահայի հանդիպումների արդյունքների ամրացմանը, այլ խաթարմանը։
«Ոչ մի ինքնագովազդ չկա ջանքերի մեջ՝ վերջ դնելու տարիներ շարունակվող հակամարտություններն ու սրացումները, որոնք հանգեցրել են բռնությունների և, ի վերջո, մահվան, ինչպես հայերի, այնպես էլ ադրբեջանցիների շրջանում: Մեր նպատակն է այստեղ տեսնել ու օգնել այս երկրներին աշխատել միասին՝ համապարփակ և տևական խաղաղություն հաստատելու և, ի վերջո, կյանքեր փրկելու համար: Ես չգիտեմ, թե դա ինչպես կարող է մեկնաբանվել որպես ինքնագովազդ։ Ինչպես պետքարտուղարն է նշել, մենք հավատարիմ ենք Հայաստանի և Ադրբեջանի միջև խաղաղ բանակցություններին։ Մենք երկու ղեկավարներին էլ խրախուսել ենք հանդիպել այն ձևաչափով, որն առավել օգտակար է նրանց համար: Մենք կարծում ենք, որ ուղղակի երկխոսությունը առանցքային է խնդիրների լուծման և կայուն խաղաղության հասնելու համար: Ահա թե ինչու պետքարտուղար Բլինքենը սեպտեմբերին Նյու Յորք էր հրավիրել Հայաստանի և Ադրբեջանի արտաքին գործերի նախարարներին՝ առաջին անգամ նրանք նույն սենյակում էին վերջին բռնությունների բռնկումից հետո:
Ի վերջո, Հայաստանն ու Ադրբեջանն են որոշում արդյո՞ք նախագահ Պուտինի հրավերը օգտակար կլինի նրանց համար կայուն խաղաղության ձգտման մեջ»,-ասել է Փրայսը՝ հավելելով, որ 2008 թվականին Ռուսաստանի ներխուժումը Վրաստան և նրա շարունակական դաժան ներխուժումը Ուկրաինա ցույց են տալիս, որ Մոսկվան քիչ է հարգում իր հարևանի ինքնիշխանությունը և դժվար թե հուսալի, երկարաժամկետ գործընկեր լինի: Բայց, ի վերջո, դա լինելու է մի որոշում, որին պետք է հասնեն Հայաստանն ու Ադրբեջանը։
Բացի այդ՝ նա նշել է, որ Հարավային Կովկասի երկրների ինքնիշխանությանն ու անկախությանը ԱՄՆ-ից ավելի մեծ աջակից չկա։ «1991 թ-ին Խորհրդային Միությունից Հայաստանի, Ադրբեջանի և Վրաստանի անկախության վերականգնումը կարևոր իրադարձություն էր, որը երաշխավորեց այս երկրներից յուրաքանչյուրի իրավունքը՝ սեփական արտաքին քաղաքական շահերը հետապնդելու՝ Մոսկվայից կամ որևէ այլ երկրից անկախ»,-ասել է Փրայսը։
Էմմա Չոբանյան
