26.08.2026 | 10:40
US Open. Ալինա Չառաևան պարտություն կրեց որակավորման փուլում
Freedom House-ի «Ազատությունը համացանցում» զեկույցում ՀՀ-ն դասվել է ազատ երկրների շարքին
Քաղաքականություն
18.10.2022 | 15:15
Freedom House-ը հրապարակել է «Ազատությունը համացանցում» տարեկան զեկույցը, որի համաձայն՝ Հայաստանը, ինչպես և նախորդ տարի, դասվել է ազատ երկրների շարքին:
Միջազգային իրավապաշտպան կազմակերպության երևանյան գրասենյակի հաղորդագրության համաձայն՝ այս տարի Հայաստանը ստացել է 74 միավոր՝ 2021 թվականից 3 միավորով ավելի:
Զեկույցն ընդգրկում է 2021 թվականի հունիսի 1-ից 2022-ի մայիսի 31-ն ընկած ժամանակահատվածը։
Դրանում նշվում է, որ Հայաստանում տեղական և միջազգային քաղաքացիական հասարակության խմբերը համատեղել են հանրային դատապարտումը մասնավոր ջատագովության հետ՝ համոզելու կառավարությանը չեղյալ համարել զրպարտությունը քրեականացնելու մասին օրենքը, որն ընդունվել էր 2021 թվականի հուլիսին:
Զեկույցում ընդգծվում է, որ օրենսդրությունը, որը քրեականացնում է պետական պաշտոնյաների և հասարակական գործիչների հասցեին հնչեցված լուրջ վիրավորանքները, գործարկվել է ամբողջ տարվա ընթացքում՝ քրեական պատասխանատվության ենթարկելու այն օգտատերերին, ովքեր կիսվել են քննադատական մեկնաբանություններով, հատկապես՝ վարչապետ Նիկոլ Փաշինյանի հասցեին։
Քաղաքացիական հասարակության ակտիվիստներն իրենց մտահոգությունները հայտնել են դիվանագետների հետ մասնավոր հանդիպումների ժամանակ և հայկական լրատվամիջոցներում, իսկ նրանց առարկություններն այնուհետ ամփոփվել են Սահմանադրական դատարանին ուղղված պաշտոնական դիմումի մեջ:
Նշվում է, որ կառավարության պաշտոնյաները համաձայնել են բացառել դրույթը 2022 թվականի հուլիսին ուժի մեջ մտած նոր քրեական օրենսգրքից և պարտավորվել են լայն խորհրդակցություններ անցկացնել ոչ կառավարական խմբերի հետ՝ ապագայում ԶԼՄ-ների հետ կապված օրենքներ մշակելիս:
Տաթև Ֆռանգյան
