Դատավոր Արուսյակ Ալեքսանյանի նկատմամբ քրեական հետապնդում հարուցելու և ազատությունից զրկելու միջնորդությունները բավարարվեցին

Բարձրագույն դատական խորհուրդը քիչ առաջ բավարարեց դատավոր Արուսյակ Ալեքսանյանի նկատմամբ քրեական հետապնդում հարուցելու և ազատությունից զրկելու մասինԳլխավոր դատախազության կողմից ներկայացված երկու միջնորդությունները։ Այս մասին Factor.am-ի հետ զրույցում տեղեկացրեց ԲԴԽ մամուլի խոսնակ Լիլիթ Շաբոյանը

Հիշեցնենք՝ Ալեքսանյանի մասով միջնորդությունները Դատախազությունը Խորհուրդ էր ներկայացրել այսօր առավոտյան։ Թե որ գործով է անցնում դատավորը, մինչ այս պահը չեն մանրամասնում ո՛չ ԲԴԽ-ից, ո՛չ Դատախազությունից.

«Քրեական վարույթի շրջանակում դատավորի նկատմամբ գործողությունները կատարվում են՝ առավելագույնս ապահովելով մինչդատական քրեական վարույթի գաղտնիությունը, դատավորի հեղինակության ու անկախության նկատմամբ հարգանքը, բացառելով դատավորի գործունեությանը ուղղակի կամ անուղղակի որևէ միջամտություն: Հետևաբար ոչ միջնորդության բովանդակության և ոչ էլ դատավորին անհատականացնող տվյալներ փոխանցել չեմ կարող»,- Factor.am-ի հետ զրույցում ժամեր առաջ նշել էր ԲԴԽ մամուլի խոսնակ Լիլիթ Շաբոյանը։

Ավելի ուշ հայտնի դարձավ, որ ձերբակալվել է փաստաբան, Աղվան Հովսեփյանի, Առուշ Առուշանյանի, Վազգեն Մանուկյանի և այլ նախկին բարձրաստիճան պաշտոնյաների գործով պաշտպան Էրիկ Ալեքսանյանը։ Դատախազությունն այս մասով ևս մանրամասներ չի ներկայացնում, սակայն նշում է, որ այս երկու գործերն իրար հետ առնչվում են.

«Փաստաբանին առաջադրված մեղադրանքը փոխկապակցված է ՀՀ գլխավոր դատախազի վերոնշյալ միջնորդությամբ Բարձրագույն դատական խորհուրդ ներկայացված փաստական տվյալների հետ»,- Factor.am-ի հետ զրույցում նշել էր Գլխավոր դատախազի խորհրդական Լուսինե Մարտիրոսյանը։

Քննչական մարմինն արդեն իսկ կալանավորելու միջնորդություն է ներկայացրել դատարան։ Էրիկ Ալեքսանյանի պաշտպան Ժիրայր Ղարագյոզյանի խոսքով՝ առաջադրված մեղադրանքում փաստաբանն իրեն մեղավոր չի ճանաչում։

Ռոզա Վարդանյան