19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Չավուշօղլուն հայտարարել է ՀՀ արտգործնախարարի հետ հանդիպելու պատրաստակամության մասին
Քաղաքականություն
17.10.2022 | 16:49
Թուրքիայի ԱԳ նախարար Մևլութ Չավուշօղլուն Թյուրքական պետությունների կազմակերպության ԱԳ նախարարների հանդիպմանը հաջորդած մամուլի ասուլիսում անդրադարձել է Հայաստանի հետ հարաբերությունների թեմային, գրում է Անադոլու գործակալությունը։
Մեկնաբանելով Հարավային Կովկասում տիրող իրավիճակը և Հայաստանի հետ հարաբերությունների կարգավորման գործընթացը՝ թուրքական դիվանագիտության ղեկավարը կոչ է արել Երևանին, իբր, զերծ մնալ «սադրանքներից և կատարել իր պարտավորությունները»։
«Սա առաջին հերթին բխում է հենց Երևանի շահերից։ Դա կարևոր է բոլոր երկրների համար»,- ասել է Չավուշօղլուն՝ նշելով, որ Անկարայի դիրքորոշումը Երևանի հետ երկխոսության հարցում չափազանց հստակ է։
Միաժամանակ, նա կրկին ընդգծել է, որ Թուրքիան համակարգում է իր դիրքորոշումը Հայաստանի հարցով Ադրբեջանի հետ։ Չավուշօղլուի խոսքով՝ Բաքվի և Երևանի միջև երկխոսության ցանկացած դրական զարգացում դրական է ազդում նաև Հայաստանի հետ Թուրքիայի բանակցությունների վրա։
Նա նաև հավելել է, որ որ Թուրքիայի և Հայաստանի հատուկ ներկայացուցիչներն իրենք կորոշեն նոր հանդիպման օրը։
Չավուշօղլուն նաև հայտարարել է, որ պատրաստ է հանդիպել իր հայ գործընկեր Արարատ Միրզոյանի հետ։
«Մենք միշտ պատրաստ ենք նման հանդիպման։ Հանդիպում եղել է Անթալիայի դիվանագիտական ֆորումի ժամանակ, մեզ համար խնդիրներ չկան, բայց այս պահին կոնկրետ ժամկետ չկա»,- ասել է թուրք պաշտոնյան։
Էմմա Չոբանյան
