ՆԱՏՕ-ն զորավարժություններ է սկսում՝ միջուկային զենքից պաշտպանության համար

ՆԱՏՕ-ն ամենամյա վարժանքներ է անցկացնում՝ դաշինքի եվրոպական տարածքը միջուկային զենքի հնարավոր կիրառման հետևանքներից պաշտպանելու համար։ Մինչև 60 ինքնաթիռներ են ներգրավված հերթական «Steadfast Noon» զորավարժություններին, որոնք սկսվել են հոկտեմբերի 17-ին և կանցկացվեն առաջիկա երկու շաբաթվա ընթացքում։ Դրանց թվում են ժամանակակից կործանիչներ, հետախուզական և լիցքավորող ինքնաթիռներ, ինչպես նաև հեռահար B-52 ռմբակոծիչներ, գրում է DW-ի ռուսական ծառայությունը։

Զորավարժությունները, մասնավորապես, կանցկացվեն Բելգիայի և Մեծ Բրիտանիայի օդային տարածքում, ինչպես նաև Հյուսիսային ծովում: Վարժանքներին մասնակցում է նաև Բունդեսվերը։ Զորավարժությունների սցենարի և մանրամասների մասին ՆԱՏՕ-ն որևէ տեղեկություն չի հաղորդում։

Միաժամանակ, ՆԱՏՕ-ում ընդգծել են, որ զորավարժություններն արձագանք չեն Ուկրաինայի դեմ Ռուսաստանի պատերազմին։

«Զորավարժությունները, որոնք կտևեն մինչև հոկտեմբերի 30-ը, սովորական ուսումնական գործողություններ են, որոնք կապված չեն միջազգային օրակարգի ընթացիկ իրադարձությունների հետ»,- հոկտեմբերի 14-ին հայտարարել էին Հյուսիսատլանտյան դաշինքից:

ՆԱՏՕ-ի խոսնակ Օանա Լունգեսկուի խոսքով՝ դրանք նպաստում են դաշինքի միջուկային զսպման արդյունավետությանն ու անվտանգությանը։

Ուկրաինայի դեմ ռուսական լայնածավալ պատերազմի բռնկումից հետո ՌԴ նախագահ Վլադիմիր Պուտինը, պետական պաշտոնյաներն ու քարոզիչները բազմիցս հասկացրել են, որ Ռուսաստանը կարող է միջուկային զենք օգտագործել։

Տաթև Ֆռանգյան