Հայ գերիներին խոշտանգելու նոր տեսանյութն ուսումնասիրվում է ՊՆ-ի կողմից

Տելեգրամյան ալիքներում հայ գերիներին խոշտանգելու նոր տեսանյութ է տարածվում։ Մոտ 30 վայրկյան տևողությանբ կադրերում երեք արնաշաղախ զինծառայողներ են երևում, որոնցից մեկը, ըստ երևույթի, սպանված է, մյուս երկուսը՝ վիրավոր։

ՀՀ Պաշտպանության նախարարության մամուլի քարտուղար Արամ Թորոսյանը Factor.am-ի հետ զրույցում նշեց, որ տեսանյութն այս պահին ուսումնասիրվում է։

Հիշեցնենք՝ ընդամենը շաբաթներ առաջ տեսանյութ էր տարածվել հայ ռազմագերիներին գնդակահարելու կադրերով, որն արժանացել էր միջազգային հանրության կոշտ քննադատությանը։ Այս մասով ՀՀ-ն արդեն իսկ Մարդու իրավունքների եվրոպական դատարան միջանկյալ միջոց կիրառելու հայց է ներկայացրել։ Տեսանյութում 8-9 անձ է պատկերված, որոնցից մի քանիսն արդեն իսկ նույնականացվել են։

Նշենք՝ հոկտեմբերի 6-ին Պրահայում կայացած Եվրոպական քաղաքական համայնքի գագաթնաժողովի շրջանակում հանդիպեցին Եվրամիության խորհրդի նախագահ Շառլ Միշելը, Ֆրանսիայի նախագահ Էմանուել Մակրոնը, Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը։ Ավելի ուշ հաղորդագրություն տարածվեց, որում ասվում է․ «Հայաստանն ու Ադրբեջանը հաստատեցին իրենց հանձնառությունը ՄԱԿ-ի կանոնադրությանը և 1991թ. Ալմա-Աթայի հռչակագրին, որոնց միջոցով երկու կողմերն էլ ճանաչում են միմյանց տարածքային ամբողջականությունն ու ինքնիշխանությունը: Նրանք հաստատեցին, որ դա հիմք կհանդիսանա սահմանազատման հարցերով հանձնաժողովների աշխատանքների համար, և որ այդ հանձնաժողովների հաջորդ նիստը կկայանա Բրյուսելում, մինչև հոկտեմբերի վերջ»:

Ռոզա Վարդանյան