ՀՔԾ-ի գումարները «մոռացե՞լ են» բաշխել․ Արդարադատության նախարարությունը օրենքի լրացման նախագիծ է ներկայացրել

«Հակակոռուպցիոն կոմիտեի մասին» օրենքն ուժի մեջ մտնելու օրվանից «Հատուկ քննչական ծառայության մասին» օրենքն ուժը կորցրած է ճանաչվել, և այս կառույցի գործունեությունը համարվել է դադարեցված։

Օրենքով նախատեսվել է, որ Հատուկ քննչական ծառայությունում գտնվող կոռուպցիոն ենթադրյալ հանցագործություններով հարուցված քրեական գործերը փոխանցվում են Հակակոռուպցիոն կոմիտե, իսկ Ծառայությունում գտնվող այլ քրեական գործերը՝ այլ քննչական մարմիններ ըստ ենթակայության։

Օրենքն ընդունելիս, սակայն, օրենսդիրն ու գործադիրը, կարծես, «մոռացել են» քրեական գործերով ՀՔԾ-ի դեպոզիտ հաշվին փոխանցված գումարի տնօրինման հարցը կարգավորել։

Արդարադատության նախարարությունն այժմ հանդես է եկել «Հատուկ քննչական ծառայության մասին» օրենքն ուժը կորցրած ճանաչելու մասին» օրենքում լրացում կատարելու նախաձեռնությամբ, որով նախատեսվում է կարգավորել ՀՔԾ-ի դեպոզիտ հաշվին առկա գումարների տնօրինման հարցը։

E-draft.am կայքում տեղադրված նախագծում նշվում է, որ Հատուկ քննչական ծառայությունում քննված և հետագայում ԱԱԾ քննչական դեպարտամենտում ուղարկված մի գործով Հատուկ քննչական ծառայության դեպոզիտ հաշվին փոխանցվել է 453.949.600 ՀՀ դրամ գումար։

Առկա է նաև ՀՔԾ-ից Ազգային անվտանգության ծառայության քննչական դեպարտամենտ փոխանցված մեկ քրեական գործ, որի կապակցությամբ Ծառայության դեպոզիտ հաշվում կա 29.888.000 ՀՀ դրամ գումար: ԱԱԾ-ն, սակայն, դեպոզիտ հաշիվ չունի, ուստի Արդարադատության նախարարությունն առաջարկում է ԱԱԾ-ում քննվող գործերով գումարը փոխանցել Դատախազության՝ քրեական գործերով պատճառված վնասի վերականգնման համար բացված դեպոզիտ հաշվին:

Ինչ վերաբերում է Հատուկ քննչական ծառայությունից Հակակոռուպցիոն կոմիտե փոխանցված քրեական գործերին, ապա այդ գործերով ՀՔԾ դեպոզիտ հաշվին առկա է 167.004. 672,5 ՀՀ դրամ գումար։

Օրենքի նախագծում նաև նշվում է, որ ՀՔԾ-ից, ըստ ենթակայության Քննչական կոմիտե է փոխանցվել 86 քրեական գործ, որոնցով Ծառայության դեպոզիտ հաշվին փոխանցված դրամական միջոցներ առկա չեն եղել, այս կառույցից գործեր չեն փոխանցվել նաև Պետական եկամուտների կոմիտե, ուստի չի առաջացել գումարը ՊԵԿ-ին փոխանցելու անհրաժեշտություն։

Արաքս Մամուլյան