Շիրակի փոխմարզպետը պաշտոնավարում է օրենքի խախտմա՞մբ․  Կոռուպցիայի կանխարգելման հանձնաժողովի եզրակացությունը

Շիրակի մարզպետի տեղակալ  Ալբերտ Այվազյանը, որը նաև Ախուրյան խոշորացված համայնքի «Քաղաքացիական պայմանագիր» խմբակցության ավագանու անդամ է և խմբակցության ղեկավարը, պաշտոնավարում է «Հանրային ծառայության մասին» մասին օրենքի 31 հոդվածի խախտմամբ, նրա պաշտոններն անհամատեղելի են։

Սեպտեմբերի  20-ին նման եզրահանգման է եկել  ՀՀ Կոռուպցիայի կանխարգելման հանձնաժողովը, քննարկելով Ախուրյան խոշորացված համայնքի «Հաղթանակ» դաշինքի ղեկավար Կարեն Արշակյանի  դիմումը, ըստ որի Ալբերտ Այվազյանը երկու անմահատեղելի հանրային պաշտոններ է զբաղեցնում։

Հանձնաժողովի եզրահանգման մեջ նշվում է,  որ այս դեպքում պաշտոնի անհամատեղելիությունը ոչ թե առնչվում է ավագանու պաշտոնին, այլ մարզպետի տեղակալի պաշտոնին  և տվյալ պաշտոնը զբաղեցնելու հանգամանքով պայմանավորված անհամատեղելիությանը։

«Եթե սույն դեպքն առնչվեր ավագանու պաշտոնին, ապա Ալբերտ Այվազյանի կողմից օրենսդրությամբ սահմանված անհամատեղելության պահանջների խախտման դեպքում  վերջինիս համար որպես ավագանի լիազորությունների դադարեցման հիմք կառաջանար։ Մինչդեռ, սույն դեպքում, մարզպետի տեղակալի կողմից անհամատեղելիության պահանջների խախտումը հիմք է մարզպետի տեղակալի լիազորությունների դադարեցման։

Սույն վարույթի շրջանակներում պարզված փաստական հանգամանքների համադրումից և վերոնշյալ իրավական նորմերի պահանջների վերլուծությունից հանձնաժողովը եզրահանգում է, որ «Հանրային ծառայության մասին» օրենքով սահմանված հանրային պաշտոն զբաղեցնող ՀՀ Շիրակի մարզպետի տեղակալ Ալբերտ Այվազյանը միաժամանակ զբաղեցնելով ՀՀ Շիրակի մարզի Ախուրյան համայնքի ավագանու անդամի պաշտոնը, զբաղեցնում է իր կարգավիճակով չպայմանավորված պաշտոն տեղական ինքնակառավարման մարմնում։

Ալբերտ Այվազյանի կողմից ՀՀ Շիրակի մարզպետի տեղակալի պաշտոնում նշանակվելուց մեկ ամսվա ընթացքում չի ապահովվել  օրենքի 31-րդ հոդվածի 5-րդ մասով սահմանված պահանջը։

Ըստ գործում առկա փաստական տվյալների՝ ՀՀ Շիրակի մարզպետի տեղակալ  Ալբերտ Այվազյանի կողմից որևէ գործողություն չի իրականացվել  համայնքի ավագանու լիազորությունները դադարեցնելու ուղղությամբ։

Արդյունքում վերջինս խախտել է «Հանրային ծառայության մասին օրենքի» 31-րդ հոդվածի 1-ին մասով հանրային պաշտոն զբաղեցնող անձի համար սահմանված անհամատեղելիության պահանջները»,-նշված է եզրահանգման մեջ ։

Ալբերտ Այվազյանը սակայն նշում է, որ չի հրաժարվելու ո՛չ փոխմարզպետի, ո՛չ էլ ավագանու պաշտոնից։ Նա վկայակոչում է  «Հանրային ծառայության մասին» մասին օրենքում հուլիսի 1-ից կատարված փոփոխություններ և լրացումները, համաձայն որոնց՝ սահմանափակումներն այլևս չեն վերաբերում ավագանու անդամներին։

Արմիկ Մովսիսյան