Մելիքսեթ Պողոսյանի որդու գործն ուղարկվել է դատարան

Մեկ տարի առաջ Սյունիքի մարզի Գորիս քաղաքում հնչած կրակոցների գործը, որով անցնում է Սյունիքի նախկին մարզպետ Մելիքսեթ Պողոսյանի որդին, ուղարկվել է դատարան։ Այս մասին տեղեկանում ենք «Դատալեքս» դատական-տեղեկատվական համակարգից։ Ըստ մեղադրանքի՝ Կարեն Պողոսյանը չպարզված ժամանակահատվածում և հանգամանքներում ապօրինի կերպով ձեռք է բերել, պահել և կրել ակոսափող ինքնաձիգ:

Բացի այդ, Պողոսյանն, ըստ մեղադրանքի, ապօրինի կերպով ձեռք բերած ակոսափող ինքնաձիգից արձակել է կրակոցներ՝ փորձելով սպանել Տիգրան Խաչատրյանին, Հարութ Վարդանյանին և Մելիք Բարսեղյանին: Պողոսյանի նկատմամբ խափանման միջոց է ընտրված չբացակայելու արգելքը։

Հիշեցնենք, որ 2021 թվականի հուլիսի 14-ի գիշերը՝ ժամը 01:00-ի սահմաններում, Գորիսի Գետափնյա և Գարեգին Նժդեհի փողոցների հատման խաչմերուկում՝ Ակսել Բակունցի արձանի մոտ, կրակոցներ են հնչել, որոնց հետևանքով երկու անձ տեղափոխվել է հիվանդանոց։ Միջադեպի մասնակից է եղել Սյունիքի այդ ժամանակվա մարզպետ Մելիքսեթ Պողոսյանի որդին՝ Կարեն Պողոսյանը, իսկ մյուս կողմից՝ Սյունիքի նախկին մարզպետ Սուրիկ Խաչատրյանի որդին՝ Տիգրան Խաչատրյանը:

Դեպքի առթիվ հարուցված քրեական գործի շրջանակներում Կարեն Պողոսյանը ներգրավվել է որպես մեղադրյալ: Որոշվել է նրա նկատմամբ խափանման միջոց ընտրել կալանավորումը, սակայն Պողոսյանը փաստացի, արգելանքի չի վերցվել, քանի որ վարույթն իրականացնող մարմնին հայտնի չի եղել գտնվելու վայրը։

Պողոսյանի նկատմամբ հայտարարվել է հետախուզում։ Այն ժամանակ, երբ Կարեն Պողոսյանը գտնվում էր հետախուզման մեջ, հայրը՝ Մելիքսեթ Պողոսյանը պնդում էր, որ որդին Հայաստանում է, հայտարարում, թե գործով ի սկզբանե սխալ քննություն է իրականացվել, և որդին կներկայանա, երբ պատշաճ քննություն իրականացվի:

Միջադեպից ավելի, քան 3 ամիս անց՝ 2021-ի սեպտեմբերի 22-ին, Կարեն Պողոսյանը ներկայացել է Քննչական կոմիտե, երկու ամսով կալանավորվել, հետո՝ ազատ արձակվել, քանի որ դատարանը չի բավարարել նրա կալանավորման ժամկետը երկարացնելու վերաբերյալ Քննչական կոմիտեի միջնորդությունը։

Պողոսյանի վերաբերյալ գործը մակագրվել է Սյունիքի մարզի ընդհանուր իրավասության դատարանի դատավոր Լուսինե Սեփխանյանին։

Արաքս Մամուլյան