Ռուսաստանը ՆԱՏՕ-ի երկրների հետ սահմաններից տեղափոխել է իր զորքերի 80%-ը․ Foreign Policy

Ռուսաստանը ՆԱՏՕ-ի անդամ երկրների՝ Լիտվայի, Էստոնիայի և Լատվիայի, ինչպես նաև Դաշինքի անդամության թեկնածու Ֆինլանդիայի հետ իր սահմաններից հետ է քաշել տեղակայված զորքերի մոտ 80%-ը։ Այս մասին հայտնում է ամերիկյան Foreign Policy պարբերականը՝ վկայակոչելով արեւմտյան զինվորականների շրջանում իր աղբյուրներին։

Նշվում է, որ այժմ Կալինինգրադի և Բալթյան տարածաշրջանի տարածքում ռուսական ցամաքային զորքերում 6000-ից ոչ ավելի մարդ կա, մինչդեռ նախկինում այդ զորքերում անձնակազմի թիվն առնվազն 30․000 էր: Մեծ կորուստները փոխհատուցելու համար զորքեր են ուղարկվել Ուկրաինա։ Սա այս տարածաշրջանում ուժերի ամենամեծ կրճատումն է վերջին յոթ ամսվա ընթացքում, ասվում է հոդվածում։

Այս թիվը շուտով կարող է փոխվել Ռուսաստանում հայտարարված մոբիլիզացիայի արդյունքում, սակայն ծառայության կանչված պահեստազորայինները, ամենայն հավանականությամբ, վատ պատրաստվածություն ու տեխնիկա կունենան, գրում է պարբերականը։

«Վերջին յոթ ամիսների ընթացքում այս տարածաշրջանից վերաբաշխումը շատ զգալի է։ Ռուսաստանը տասնամյակներ շարունակ մեզ մոտ պահել է ցամաքային ուժ, որն այժմ գործնականում անհետացել է»,- հրատարակությանը հայտնել է սկանդինավյան երկրներից մեկի անանուն զինվորականը:

«Այսօր Բալթյան երկրների համար ռուսական սպառնալիքը նույնը չէ, ինչ մեկ տարի առաջ էր, քանի որ ռուսական բանակը զգալիորեն կորցրել է իր մարտունակությունը»,- նշել է փորձագետ Ջիմ Թաունսենդը՝ հավելելով, որ Բալթյան փոքր երկրները չեն կարող իրենց թույլ տալ հանգստանալ:

Ավելի վաղ հաղորդվել էր, որ Ռուսաստանը թուլացրել է Սանկտ Պետերբուրգի մերձակայքում հակահրթիռային պաշտպանությունը, քանի որ նրան անհրաժեշտ են С-300 հրթիռային համակարգեր Ուկրաինայի դեմ պատերազմի համար։

Տաթև Ֆռանգյան