Դատավոր Բորիս Բախշիյանն արդարացվեց

Սյունիքի մարզի ընդհանուր իրավասության դատարանի դատավոր (լիազորությունները կասեցված են) Բորիս Բախշիյանն արդարացվեց։ Սյունիքի մարզի ընդհանուր իրավասության դատարանը՝ դատավոր Լուսինե Սեփխանյանի նախագահությամբ, քիչ առաջ հրապարակեց վճիռը՝ արդարացնելով Բախշիյանին՝ ճանաչելով և հռչակելով դատավորի անմեղությունը։

Factor.am-ի հետ զրույցում նշեց պաշտպան Արսեն Սարդարյանն ասաց. «Դատավոր Բորիս Բախշիյանն արդարացվեց, նրա բարեխիղճ, անաչառ և օբյեկտիվ դատավոր լինելն ապացուցվեց: Դատախազության, քննչական մարմնի և ԲԴԽ անդամ անձինք, որոնք առնչություն են ունեցել Բախշիյանի նկատմամբ իրականացված ակնհայտ ապօրինի և դաժան քրեական հետապնդմանը, ներողություն կխնդրեն վերջինից՝ դրանով իսկ ցույց տալով, որ զղջում են կատարվածի համար, և որ իրենց գործողությունները մոլորության հետևանք են, այլ ոչ ուղղորդված ոտնձգություն դատական իշխանության անկախության նկատմամբ»,- նշեց Սարդարյանը՝ հույս հայտնելով, որ Դատախազությունը վերաքննիչ բողոք չի ներկայացնի։

Հիշեցնենք՝ դատավոր Բորիս Բախշիյանի նկատմամբ քրեական հետապնդում իրականացվում է ամբաստանյալ Նվեր Մկրտչյանին կալանավորելու որոշում կայացնելու համար։ Ըստ նախաքննական մարմնի նախնական վարկածի, Մկրտչյանին դատավորն ակնհայտ ապօրինի կալանավորելու որոշում է կայացրել։ Բախշիյանին ի սկզբանե մեղադրանք էր առաջադրվել ՀՀ քրեական օրենսգրքի 348-րդ հոդվածի 3-րդ մասով՝ անձին ապօրինի կալանավորելու հատկանիշներով, որն առաջացրել է ծանր հետևանք։ Վարույթն իրականացնող մարմինը որպես ծանր հետևանք էր դիտարկել այն հանգամանքը, որ ամբաստանյալ Մկրտչյանի նկատմամբ, «Գորիս» ՔԿՀ-ում, իբրև ազդեցություն է գործադրվել՝ հարկադրելով փոխել ցուցմունքը, ինչն էլ հանգեցրել է նրան, որ Քաջարանի համայնքապետ Մանվել Փարամազյանի խափանման միջոց կալանավորումը փոխարինվի գրավով։ Քրեական գործով նախաքննության ավարտ է հայտարարվել, ու նախաքննական մարմինը հրաժարվել է իր նախնական մեղադրանքից, Բախշիյանի մեղադրանքը վերաորակվել և մեղադրանք է առաջադրվել ՀՀ ՔՕ 348-րդ հոդվածի 2-րդ մասով՝ ակնհայտ ապօրինի կալանավորելու հատկանիշներով։ Այս գործով դատավորը երեք ամիս կալանքի տակ է եղել և ազատ է արձակվել մայիսի 7-ին։

Ռոզա Վարդանյան