Թեհրանի դիրքորոշումը Հարավային Կովկասի զարգացումների մասով հստակ է՝ որևէ երկիմաստություն չկա․ Իրանի ԱԳՆ

Իրանի ԱԳՆ խոսնակ Նասեր Քանանին այսօր անցկացված ճեպազրույցում անդրադարձել է նաև Հայաստանի դեմ Ադրբեջանի իրականացրած ագրեսիային։ Mehr գործակալության փոխանցմամբ՝ նա նշել է, որ այս հարցում Իրանի դիրքորոշման մեջ երկիմաստություն չկա։

«Իրանի Իսլամական Հանրապետության անկեղծ ու հստակ դիրքորոշումը հարավկովկասյան տարածաշրջանում տեղի ունեցող զարգացումների վերաբերյալ պաշտոնապես բազմիցս արտահայտվել է տարբեր մակարդակներով, և որևէ երկիմաստություն չկա։ Ցավոք, անցյալ երեքշաբթի օրվանից մենք ականատես եղանք նոր սահմանային հակամարտության Հայաստանի և Ադրբեջանի միջև, որը հանգեցրել է երկու կողմից մեծ թվով զոհերի ու վիրավորների։ Հիմնվելով հարևանության քաղաքականության վրա և փորձելով կառուցողական օգնություն ցուցաբերել տարածաշրջանային ճգնաժամերի կարգավորմանը՝ Իրանը որքան հնարավոր է՝ շուտ սկսեց քաղաքական ջանքերը»,- ասել է խոսնակը։

Նա նաև հիշեցրել է, որ Հայաստանի վարչապետը հեռախոսազրույց է ունեցել Իրանի նախագահի հետ, որի ընթացքում նախագահ Ռաիսին հայտնել է Իրանի տեսակետներն ու դիրքորոշումները խնդրի առնչությամբ և հայկական կողմին փոխանցել իր քաղաքական առաջարկները։ Բացի այդ, իրանցի դիվանագետը հիշեցրել է, որ հեռախոսազրույց են ունեցել նաև Իրանի և Ադրբեջանի ԱԳ նախարարները ու քննարկել հարցը։

«Իրանի սկզբունքային դիրքորոշումները հստակ են, և մենք հավատում ենք քաղաքական մոտեցումների և լուծումների կիրառման անհրաժեշտությանը՝ հակամարտությունները դադարեցնելու, լարվածությունը նվազեցնելու և քաղաքական երկխոսության մեջ մտնելու երկու երկրների միջև տարաձայնությունները լուծելու համար։ Ինչ վերաբերում է տարածաշրջանի աշխարհաքաղաքականությանը, Իրանի քաղաքականությունը պարզ է։ Մենք կարծում ենք, որ այն, ինչ կարող է օգնել լուծելու այդ վեճերը, երկխոսություններ սկսել, քաղաքական կամքի առկայությունն է երկու երկրներում և տարածաշրջանային շրջանակների օգտագործումը, որը կօգնի վերջ դնել հակամարտություններին»,- ասել է Քանանին։

Էմմա Չոբանյան