Էրդողանը հայտարարել է, թե «Ադրբեջանն ավարտել է ռազմական գործողությունը Հայաստանի հետ սահմանին»

Թուրքիայի նախագահ Ռեջեփ Թայիփ Էրդողանը հայտարարել է, որ Ադրբեջանի նախագահ Իլհամ Ալիևից տեղեկատվություն է ստացել «Հայաստանի հետ սահմանին ռազմական գործողության ավարտի» մասին:

«Ադրբեջանը հայտարարել է Հայաստանի սադրանքներին ի պատասխան սկսված գործողության ավարտի մասին։ Քանի որ գործողությունն արդեն ավարտված է, իմաստ չկա քննարկել այն հիմա։ Համաձայն այն տեղեկատվության, որը ես ստացել եմ պարոն Իլհամ Ալիևից, մեր ադրբեջանցի եղբայրներն այժմ տեղափոխվել են անվտանգ դիրք»,- «ՌԻԱ Նովոստի»-ի փոխանցմամբ՝ Սամարղանդից վերադառնալուց հետո ինքնաթիռում լրագրողներին ասել է Էրդողանը։

Հիշեցնենք՝ չնայած Էրդողանի պնդումներին՝ Ադրբեջանն ինքն է նախահարձակ գործողություններով ագրեսիա իրականացրել ՀՀ ինքնիշխան տարածքի նկատմամբ․ սեպտեմբերի 13-ին՝ ժամը 00։05-ի սահմաններում, Ադրբեջանի զինված ուժերի ստորաբաժանումները, հրետանային միջոցների, ականանետերի ու ԱԹՍ-ների կիրառմամբ ինտենսիվ կրակ են բացել հայ-ադրբեջանական սահմանի միանգամից մի քանի հատվածում տեղակայված հայկական դիրքերի ուղղությամբ։ Մասնավորապես՝ հրետակոծման են ենթարկվել Սոթքի, Վարդենիսի, Գորիսի, Կապանի, Արտանիշի և Իշխանասարի ուղղությամբ տեղակայված դիրքերը։ Հարվածներ են հասցվել նաև քաղաքացիական ենթակառուցվածքներին։ Հայկական կողմը հայտնել է 135 զոհերի մասին։

ՀՀ անվտանգության խորհրդի քարտուղար Արմեն Գրիգորյանը Հանրային հեռուստաընկերությանը տված հարցազրույցում հայտնել էր, որ միջազգային հանրության ներգրավվածության շնորհիվ է հաջողվել ձեռք բերել հրադադարի պայմանավորվածություն։