30.04.2026 | 15:35
Ռուսական Storm-1516-ը շուրջ 25 անգամ անդրադարձել է ՀՀ-ին ու Փաշինյանին. Bloomberg-ը՝ ՌԴ-ի ապատեղեկատվական արշավի մասին
«ՀԱՊԿ-ից դուրս Հայաստան». բողոքի ակցիա Երևանում
Հասարակություն
17.09.2022 | 18:31
Այսօր մայրաքաղաքի փողոցներով բողոքի երթ է անցկացվել «ՀԱՊԿ-ից դուրս Հայաստան» կարգախոսով։ Ակցիայի մասնակիցները իրենց դժգոհությունն են արտահայտել, որ ՀԱՊԿ-ը միջոցներ չի ձեռնարկել՝ կանխելու Ադրբեջանի ագրեսիան, իսկ բախումների ժամանակ չի ցուցաբերել ռազմական օգնություն Հայաստանին՝ պաշտպանելու հիմնադիր անդամ պետության տարածքային ամբողջականությունը։ Նրանք համարում են, որ կազմակերպությունն այլևս ժամանակավրեպ, անօգուտ և վնասակար է Հայաստանի Հանրապետության համար։
«Միջազգային հանրությունը սատար է կանգնել Հայաստանի Հանրապետությանը, և միաժամանակ փաստում ենք, որ Հավաքական Անվտանգության Պայմանագրի կազմակերպությունը՝ ՀԱՊԿ-ը, որի հիմնադիր անդամ է հանդիսանում Հայաստանի Հանրապետությունը, և այդ կազմակերպության անդամ երկրները, գրավել են չեզոք կամ հակադիր դիրք՝ ուղղակի և անուղղակի կերպով վնասելով Հայաստանին:
Հավաքական անվտանգության մասին Պայմանագրի 4-րդ հոդվածը հայտարարում ենք, որ խախտված է։ Այս հոդվածի համաձայն՝ «եթե անդամ պետություններից որևէ մեկը ենթարկվի ագրեսիայի որևէ պետության կամ պետությունների խմբի կողմից, ապա անդամ պետությունների կողմից դա կհամարվի որպես ագրեսիա սույն Պայմանագրի բոլոր մասնակից պետությունների դեմ։ Հայաստանի պարագայում օրերս տեսանք, որ որևէ գործողություն կառույցը չի իրականացրել»,- իր խոսքում նշեց ակցիայի մասնակից Նարեկ Այվազյանը։
Նա շեշտեց՝ կազմակերպության և կազմակերպության անդամների որդեգրած դիրքորոշումները Հայաստանի անվտանգության, տարածքային ամբողջականության, ինքնիշխանության և միջազգային խաղաղության նկատմամբ, ինչպես նաև Պայմանագրի կարևորագույն կետի խախտումը հիմք են տալիս պահանջել ՀՀ կառավարությունից և խորհրդարանից դուրս գալ ՀԱՊԿ-ից օր առաջ և առավելագույնս խորացնել հարաբերությունները մեզ աջակցած բոլոր երկրների հետ։
Ակցիայի մասնակիցները շրջեցին Երևանի կենտրոնական փողոցներով և վանկարկումներով քաղաքացիների ուշադրությունը հրավիրեցին ՀԱՊԿ-ի որդեգրած քաղաքականությանը։
Ռոզա Վարդանյան
