Ի՞նչը ինչի հետ համեմատել՝ փայլուն արդյունք ցույց տալու համար. ավտոմեքենաների թիվն ու ժողովրդի սոցիալական վիճակը. ՏԵՍԱՆՅՈՒԹ

Համաձայն ՀՀԿ-ի, անկախ աղքատության և գործազրկության վիճակագրական ցուցանիշներից, Հայաստանում մարդկանց վիճակը լավացել է, ու որպես դրա ապացույց բերվում է ավտոմեքենաների թվի ավելացումը:

Վարչապետ ընտրվելիս, 2018թ. ապրիլի 17-ին, Սերժ Սարգսյանը, ԱԺ պատգամավորի սոցիալական վիճակի վերաբերյալ հարցին ի պատասխան, մեջբերեց վիճակագրական թվեր, թե 2007թ. հունվարի 1-ի դրությամբ ՀՀ-ում հաշվառված էր 333 հազար ավտոմեքենա, իսկ 2018թ. հունվարի 1-ի դրությամբ՝արդեն 616 հազար ավտոմեքենա: Ավտոմեքենաներով մարդկանց սոցիալական իրավիճակը բնութագրել, իհարկե, կարելի է, բայց այն դեպքում, երբ մեքենան թանկարժեք է և դիտվում է որպես շքեղություն: Հայաստան ներկրվող մեքենաների թիվն իրապես աճում է:

2013-ին Հայաստան է ներկրվել 41,1 հազար մեքենա՝ 6.4 հազարով ավելի 2012-ից: 2014թ. Հայաստան է ներկրվել 46 հազար 475 հատ ավտոմեքենա: 2015-ին՝ ԵՏՄ մուտքով պայմանավորված, մարդատար ավտոմեքենաների ներմուծումը պակասեց՝ դառնալով 27.3 հազար, մաքսային արժեքը՝ 133 մլն դոլար: 2016 թվականի ընթացքում Հայաստան ներկրվեց 33 հազար մարդատար ավտոմեքենա, մաքսային արժեքը՝ 130 մլն 601 հազար ԱՄՆ դոլար:

Այսինքն, մեքենաների թիվն աճել է, մաքսային արժեքը՝ նվազել: 2017-ին ներկրվել է 39 հազար 270 ավտոմեքենա: 2018թ. առաջին եռամսյակում, նախորդ տարվա նույն ժամանակի համեմատ, 168.1 տոկոսով ավելացել է ներմուծվող մեքենաների թիվը՝ կազմելով 13.768 մեքենա:

Մաքսային արժեքի նվազումն իսկ փաստում է, որ Հայաստան են բերվում էժան ավտոմեքենաներ: Մասնագետները հաճախ են պնդում, որ չունենալով թանկ մեքենաներ ձեռք բորելու համար համապատասխան միջոցներ, մարդիկ գնում են հնամաշ, օդը առավելագույնս աղտոտող, վատ մեքենաներ: Հայաստանից, միաժամանակ, մեքենաները գրեթե դուրս չեն գալիս: Արդյունքում, մեր երկիրը դառնում է ավտոմեքենաների գերեզմանոց:

Առավել մանրամասն՝ տեսանյութում: