Հասարակություն
07.09.2022 | 13:53
Շվեյցարացի աշխարհահռչակ աստղաֆիզիկոս, Նոբելյան մրցանակակիր Միշել Մայորը Երևանի պետական համալսարանում հանդես է եկել աստղաֆիզիկայի բնագավառին առնչվող դասախոսությամբ՝ ներկայացնելով տիեզերական օբյեկտները, այդ թվում՝ իր հայտնագործությունը՝ արեգակնանման «51 Pegasi b» էքսոմոլորակը, և դրա ունեցած դերը աստղագիտության հետագա զարգացման գործում․ տեղեկացնում են ՀՀ ԿԳՄՍՆ-ից։
Այդ հայտնագործության համար Միշել Մայորը և շվեյցարացի աստղագետ Դիդիե Քելոն 2019 թվականին ֆիզիկայի բնագավառում արժանացել են Նոբելյան մրցանակի։
Անդրադառնալով աստղագիտության մեջ առաջին էքսոմոլորակի հայտնագործության ունեցած նշանակությանը՝ բանախոսը նշել է, որ դրանից հետո մի շարք աստղագետներ հաստատել են մոլորակի գոյությունը և սկսել առավել մանրակրկիտ ուսումնասիրել «51 Pegasi b»-ի առանձնահատկությունները:
Անդրադառնալով այն հարցին, թե արդյոք հնարավոր է էքսոմոլորակներում կենսակերպ վարել, բանախոսը ժպիտով պատասխանել է․ «Չի բացառվում, որ որոշ մոլորակներում կյանք կա, սակայն այդ մոլորակները մեզանից չափազանց հեռու են: Հարցի պատասխանը ստանալու համար հարկավոր է գնալ և տեղում հասկանալ»։
Աստղաֆիզիկոսը, անդրադառնալով նաև հաջողակ գիտնական դառնալու նախապայմաններին, ընդգծել է․ «Աստղաֆիզիկայի բնագավառում հաջողություններ գրանցելու համար անհրաժեշտ է ունենալ հետաքրքրասիրություն, որոշակի հմտություններ և ֆիզիկայի ու մաթեմատիկայի վերաբերյալ համապարփակ գիտելիքներ: Եթե դու պատրաստ ես միևնույն խնդրի ուղղությամբ անընդմեջ աշխատել և դա անում ես մեծագույն սիրով և պատասխանատվությամբ, ապա դու պետք է զբաղվես գիտությամբ»։
Սեպտեմբերի 6-ին փառատոնի շրջանակում Հայաստանի ազգային պոլիտեխնիկական համալսարանում դասախոսություն է կարդացել ավիատիեզերական ինժեներ Ժան–Ժակ Դորդեինը։
Նա 2003-2015 թթ․ եղել է Եվրոպական տիեզերական գործակալության գլխավոր տնօրենը: ESA-ում իր պաշտոնավարման ընթացքում պարոն Դորդեինը զարգացրել է ESA-ի հարաբերությունները Եվրոպական միության և նրա ինստիտուտների հետ: Նա ղեկավարել է Ariane-ի հաջող արձակումների երկար շարքը, ինչպես նաև ուղեծիր է դուրս բերել Երկրի դիտման արբանյակներ՝ եզակի տվյալներ տրամադրելով գիտական համայնքներին՝ հասկանալու և վերահսկելու Երկրի շրջակա միջավայրը և կլիմայի փոփոխությունը:
Գիտական դասախոսություններ են հնչել նաև Հայաստանի ամերիկյան համալսարանում: NASA Jet Propulsion Laboratory-ի գիտնական-ինժեներ Նեյգին Քոքսն ուսանողների հետ կիսվել է իր փորձառությամբ:
