Ադրբեջանի լրատվամիջոցների հերթական կեղծիքը․ օտարալեզու ադրբեջանական կայքերով Շուշիում հայերի «վանդալիզմի» մասին քարոզչական նյութեր են տարածվում

Ադրբեջանական լրատվամիջոցները հերթական անգամ կեղծիքով փորձում են մանուպուլացնել ու հիմարեցնել սեփական հանրությանն ու ցանկալին ներկայացնել որպես իրականության։ Մասնավորապես, ադրբեջանական քարոզչամիջոցներն ակտիվորեն տեղեկություն են տարածում, թե միջազգային մամուլում հրապարակումներ են եղել Շուշիի մասին, որտեղ, իբր, հայերը «բարբարոսություններ» են արել ու «վանդալիզմով» զբաղվել։

Նախ՝ ադրբեջանական լրատվականները սկսեցին գրել, որ ֆրանսիական Lagazetteaz.fr-ում հրապարակվել է «Շուշի, 30 տարի անց» ֆիլմը, որում պրոֆեսոր Էլչին Ահմեդովը պատմում է «հայերի կողմից ավերված իր տան մասին»։

Այնուհետև ադրբեջանական քարոզամեքենան սկսեց գրել, որ այս նույն ֆիլմը հրապարակվել է նաև ավստրիական մամուլում՝ Dasfazit.at կայքում, որը հղում է կատարում վերոնշյալ ֆրանսալեզու կայքին։

Ուսումնասիրությունը ցույց է տալիս, որ վերանշյալ լրատվամիջոցները ադրբեջանական քաղոզչամեքենայի գործիքներից են Ֆրանսիայում ու Ավստրիայում, դրանք պարզապես օտարալեզու ադրբեջանական լրատվականներ են։

Մասնավորապես, ֆրանսիական Lagazetteaz.fr անվան մեջ az-ի առկայությունն արդեն իսկ հուշում է, որ այն ադրբեջանական է։ Ավելին, կայքը հիմնադրել է Ադրբեջանի քարոզչամեքենաներից Trend լրատվական գործակալությունը։ Ի դեպ, կայքի գլխավոր տնօրեն Ժան Միշել Բրյունն այս տարի ապրիլին Արցախի գրավյալ հայկական Շուշիում մասնակցում էր Ադրբեջանի հերթական քարոզչական համաժողովին։

Ավստրիական Dasfazit.at-ը ևս պատկանում է Ադրբեջանին։ Հենց կայքում է նշվում, որ գործադիր տնօրենն Ալթայ Ալասգարովն է և այն նույնպես պատկանում է Trend գործակալությանը։

Էմմա Չոբանյան