«Քաղաքապետը»․ Հայկ Մարությանը վերսկսում է դերասանական գործունեությունը

Երևանի նախկին քաղաքապետ, դերասան Հայկ Մարությանը վերադարձել է իր մասնագիտական աշխատանքին։ Ֆեյսբուքյան իր հետևորդներին Հայկ Մարությանը տեղեկացրել է, որ հանրային գործունեությանը զուգահեռ վերսկսում է իր ստեղծագործական աշխատանքը և հանդիսատեսի դատին է հանձնում իր նոր՝ «Քաղաքապետը» մոնոներկայացումը։

Հիշեցնենք, որ Հայկ Մարությանը 2018 թվականին այդ ժամանակ ընդդիմադիր Նիկոլ Փաշինյանի ղեկավարած ակցիաների ակտիվ մասնակիցներից էր, իսկ հեղափոխությունից հետո իշխող թիմը նրան առաջադրեց քաղաքապետի թեկնածու։ 2018-ի սեպտեմբերի 23-ին կայացած ընտրություններում «Իմ քայլը» դաշինքը հավաքեց ավելի քան 81 տոկոս քվե, և Մարությանը դարձավ քաղաքապետ։

Պաշտոնավարման ընթացքում մամուլը պարբերաբար գրում էր նրա և իշխող թիմի լարված հարաբերությունների,սպասվող հրաժարականի մասին, սակայն ինքը՝ Մարությանը, այդ մասին չէր խոսում և հերքում էր հրաժարականի մասին լուրերը։

Ավելի ուշ «Իմ քայլը» խմբակցությունը հայտարարեց նրան անվստահություն հայտնելու գործընթացի մասին, և 2021թ-ի դեկտեմբերին Մարությանը հեռացավ քաղաքապետի պաշտոնից։ Նա իր վերջին ելույթի ժամանակ արդեն անթաքույց խոսեց իր և իշխող թիմի միջև հակասություններից։ Դատելով մոնոներկայացման գովազդային հոլովակից՝ հենց այդ հակասությունների վրա էլ կառուցված է ներկայացման սյուժեն։

Հիշեցնենք՝ քաղաքապետի պաշտոնը ստանձնելուց հետո Մարությանը դադարեցրել էր ստեղծագործական գործունեությունը և հիմա, փաստորեն, կրկին վերադառնում է դերասանական կարիերային։