28.06.2026 | 05:30
ԱԱ-2026. Պորտուգալիան չհաղթեց Կոլումբիային ու փլեյ-օֆֆ դուրս եկավ երկրորդ տեղով. ՏԵՍԱՆՅՈՒԹ
Յուրաքանչյուր չփրկված կյանք անջնջելի հետք է թողնում․ փրկարարն արդեն 4 օր է՝ «Սուրմալու»-ում է․ ՏԵՍԱՆՅՈՒԹ
Հասարակություն
17.08.2022 | 20:40
4 օր շարունակ, գիշեր ու ցերեկ, կարճ դադարներով 36-ամյա Կարեն Ավետիսյանն ու նրա նման հարյուրավոր փրկարարներ որոնողական աշխատանքներ են իրականացնում «Սուրմալու» առևտրի կենտրոնում։ Կարենը փրկարար ծառայությունում է արդեն 11 տարի։
«Սուրմալու» առևտրի կենտրոնում տեղի ունեցած ուժգին պայթյունից հետո փրկարարները հաճախ ծանր տեխնիկա կիրառելու հնարավորություն չեն ունեցել, փլատակներում մնացած քաղաքացիներին չվնասելու համար ձեռքերով են քարերը մաքրել։ Ողջ քաղաքացիների միայն դեպքից հետո 2 ժամվա ընթացքում են դուրս բերել։ Զգացողությունները բառերով բացատրել Կարենը չի կարողանում։ Աշխատանքները դեռ շարունակվում են՝ մինչև փլատակներից կգտնեն ու դուրս կբերեն վերջին քաղաքացուն։ Սա, աշխատանք լինելուց բացի, նաև սուրբ պարտք է՝ ասում է փրկարարը։
Այս օրերի ընթացքում Կարեն Ավետիսյանը կարճ ժամանակով է տուն գնացել՝ քնելու։ Փրկարարների հասցեին ուղղված ո՛չ շնորհակալական, ո՛չ էլ դժգոհության խոսքերը չի լսել, բայց եթե այդպիսիք եղել են, ապա միայն թերի տեղեկացվածության արդյունք է՝ ասում է։ Ո՛չ փրկարարները, ո՛չ էլ աշխատանքներին մասնակցող կամավորները ոչ մի վայրկյան ջանք չեն խնայել։
Որոնողա-փրկարարական աշխատանքների ժամանակ, երբ մարդկային կյանքերի հարց է դրված, ո՛չ ֆիզիկական, ո՛չ հոգևոր լարվածությունը ու որևէ այլ բան փրկարարին շեղել չի կարող․ տրտնջալու ու դանդաղելու իրավունք չունեն, ամեն վայրկյանը կարող է կյանք արժենալ։
Հիմա պայթյունի տարածքում կամավորներ չկան, աշխատանքները զուգահեռաբար նաև փլուզված շենքի ներսում պետք է տարվեն, իսկ դա կարող են անել միայն հատուկ պատրաստված մասնագետները։ Ժամեր առաջ 3 փրկարար արդեն շենքի ներս է մտել, հետախուզում իրականացրել՝ հետագա աշխատանքները կազմակերպելու համար։
Տանը Կարենին ծնողները, հղի կինն ու փոքրիկ դուստրն են սպասում։ Դժվարությամբ, բայց վտանգավոր աշխատանքի հետ արդեն համակերպվել են։ Թե որքան դեռ աշխատանքները կշարունակվեն, Կարենը դժվարանում է ասել։ Հստակ է մեկ բան՝ աշխատանքները մի օր այստեղ էլ կավարտվեն, բայց այս մասնագիտությունն ընտրած մարդու առաքելությունը փրկելն է, իսկ յուրաքանչյուր չփրկված կյանք իր անջնջելի հետքն է թողնում։
Մանրամասները՝ տեսանյութում։
Սաթենիկ Հայրապետյան
Արփի Հակոբյան
