11.01.2025 | 20:13
Կրակը Գլենդելից հեռու է. քաղաքապետը մանրամասներ է ներկայացրել
Գյումրիում երթուղի է դուրս եկել 13 նոր միկրոավտոբուս
Տնտեսություն
02.08.2022 | 18:34
Գյումրիում այսօր երթուղի են դուրս բերվել սուբվենցիոն ծրագրով ձեռք բերված 63 միկրոավտոբուսներից 13-ը։ Դրանք սպասարկելու են Գյումրու ծայրամասային «Մուշ» թաղամասը կենտրոնին կապող թիվ 25 երթուղին։
Հիշեցնենք, որ Գյումրու համայնքապետարանը դեռ մեկ տարի առաջ կառավարության համաֆինանսավորմամբ էր ձեռք բերել միկրոավտոբուսները, բայց դրանք մի տարի է՝ չէին շահագործվում, կայանված էին «Սև Բերդ» ամրոցի տարածքում, ինչը գյումրեցիների շրջանում դժգոհությունների ու քննադատությունների առիթ էր տվել։
Գյումրիում հին միկրոավոտբուսներն աշխատում են գերծանրաբեռնված, իսկ որոշ երթուղիներ ժամը 19․00-ից հետո չեն սպասարկվում։ Գյումրու քաղաքապետարանից մեզ փոխանցեցին, որ 13 միկրոավտոբուսները երթուղի են դուրս գալիս առավոտյան ժամը 7․30-ից, իսկ երեկոյան մինչև 20․30 գծի մեջ կլինի 4 մեքենա։
«Քանի որ առաջին օրն է, ուսումնասիրում ենք՝ օրվա ընթացքը՝ժամերի առումով, մեքենաների թվի առումով, տեսնում են մեքենաներիի թիվը բավականացնո՞ւմ է, չի բավականացնում, որպեսզի միջոցներ ձեռնարկեն մեքենաների թվի ավելացման կամ ժամային գրաֆիկի փոփոխման»,-պարզաբանեցին Գյումրու քաղաքապետարանից։
Մեզ նաև տեղեկացրին, որ քննարկվում է մյուս երթուղային գծերը ևս նոր ձեռք բերված միկրոավտոբուսներով համալրելու հարցը, փորձում են հնարավորինս արագ կարգավորել խնդիրը․ միկրոավտոբուսներն արդեն կայանված են «Գյումրի ավտոբուս» ՓԲԸ-ի տարածքում։
Երթուղիները շահագործելու են ոչ թե անհատ «գծատերերը», այլ Գյումրու քաղաքապետարանի ենթակայությամբ գործող «Գյումրի ավտոբուս» ՓԲԸ-ն։
Արմիկ Մովսիսյան
