Մեր օպերային թատրոնը վերածվել է փորձադաշտի. «սյուրպրիզներով» ենք ապրում. Բարսեղ Թումանյան․ ՏԵՍԱՆՅՈՒԹ

«Ինչպես երեխային փորձնական որևէ դայակի չեք տա, այդպես էլ` օպերային թատրոնի դեպքում պետք է լինի: Այսօր մեր օպերային թատրոնը վերածվել է փորձադաշտի. «սյուրպրիզներով» ենք ապրում, թատրոնի ղեկավարությունն էքսպերիմենտներ է անում: Լավ կլիներ` այնտեղ տաղանդավոր ռազմավար աշխատեր: Այնտեղ չի աշխատում համակարգ. գեղարվեստական ղեկավարի, դիրիժորի, տնօրենի տեսլականը հայտնի չէ: Թատրոնում մեծ թերացումներ եմ տեսնում»,- Factor TV-ի հետ զրույցում նման տեսակետ է հայտնում ՀՀ ժողովրդական արտիստ, օպերային երգիչ Բարսեղ Թումանյանը:

Նրա խոսքով` շատ կարևոր է այն, թե ովքեր են Ալ. Սպենդիարյանի անվան օպերայի և բալետի ազգային ակադեմիական թատրոնի ղեկավար ընտրողները. «Օրինակ` իմ կարծիքը չեն հարցրել, մինչդեռ ես օպերային արվեստի բնագավառում եմ արդեն 43 տարի: Ու էլի ինձ պես շատերի կարծիքը հաշվի չի առնվել: Ընտրողները մարդիկ են, որոնք օպերային արվեստի հետ բացարձակ կապ չունեն ո´չ քաղաքական, ո´չ մասնագիտական առումով»:

Բարսեղ Թումանյանը, որ հանդես է եկել աշխարհի մեծ բեմերում, վստահ է` օպերային արվեստը մեր երկրում մեծ պոտենցիալ ունի, ուստի դրան պետությունը պետք է հատուկ ուշադրություն դարձնի.

«Հայաստանում մնալն ինձ համար նույնն էր, ինչ ինքնասպան լինելը: Բայց ես էլի իմ տեղը փորձում եմ գտնել դասավանդելու, դրսում աշխատել-վերադառնալու միջոցով: Մենք մեր կրթական ֆոնդի միջոցով պետք է տաղանդավոր մարդկանց բացահայտենք»,-ասում է նա:

Բարսեղ Թումանյանն անդրադառնում է նաև ռաբիս երաժշտությանը և դրա` արագ տեմպերով տարածման ֆոնին դասական երաժշտության թույլ պրոպագանդմանը. «Ռաբիսը, կլկլոցը չունի ինքնություն, դեմք, տեսակ, այն վիրուս է, որը մաշում է մեր իմունային համակարգը: Եթե մեր իմունային համակարգն ամուր լինի, ուրիշի`մուղամ հիշեցնող մշակույթը չենք վերցնի: Եթե Հայաստանում նույնքան հետևողականորեն պրոպագանդվի դասականը, հանրությունը կուրորեն, երեխայի պես կգնա դեպի այդ կողմ»:

Նրա համոզմամբ` նախ պետք է մշակութային պետություն ստեղծել, որպեսզի զբոսաշրջությունն էլ զարգանա: Այս համատեքստում Բարսեղ Թումանյանը խոսում է նաև ԲՀԿ ղեկավար Գագիկ Ծառուկյանի` Հայաստանում Քրիստոսի արձանը կանգնեցնելու նախաձեռնությանը. «Դա սրբապղծություն է, այդ կերպ մենք կշեշտենք ոչ թե մեր հավատացյալ լինելը, այլ հակառակը` այն, որ հավատ չունենք: Իսկ զբոսաշրջիկների համար կա Էջմիածինը»:

Մանրամասները` տեսանյութում:

Աննա Բաբաջանյան