20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Պուտինը, Էրդողանն ու Ռաիսին Թեհրանում համատեղ հայտարարություն են ընդունել
Քաղաքականություն
20.07.2022 | 11:49
Ռուսաստանի նախագահ Վլադիմիր Պուտինը հայտարարել է, որ Թեհրանում կայացած եռակողմ հանդիպումից հետո, որին մասնակցում էին սիրիական կարգավորման՝ Աստանանյան գործընթացի երաշխավոր երկրների ղեկավարները, համատեղ հայտարարություն է ընդունվել, հայտնում է ՏԱՍՍ-ը։
«Սիրիական կարգավորմանն աջակցելու Աստանայի գործընթացի երաշխավոր երկրների ղեկավարների հանդիպումն իսկապես օգտակար էր և շատ բովանդակալից։ Գործնական և կառուցողական մթնոլորտում պարոն Ռաիսիի և Էրդողանի հետ մենք, ըստ էության, քննարկել ենք Սիրիայի հարցում մեր համագործակցության առանցքային ասպեկտները»,- ասել է Պուտինը գագաթնաժողովից հետո։
«Ընդունված համատեղ հայտարարությունը վերահաստատում է Ռուսաստանի, Իրանի և Թուրքիայի միջև եռակողմ համագործակցության ամրապնդման հանձնառությունը՝ Սիրիայում իրավիճակի կայուն և կենսունակ կարգավորման հասնելու շահերից ելնելով»,- ասել է Պուտինը։
Պուտինը վստահ է, որ Թեհրանի գագաթնաժողովում ընդունված որոշումները կօգնեն վերջապես խաղաղություն հաստատել Սիրիայում։
«Վստահ եմ, որ գագաթնաժողովում ընդունված որոշումները կնպաստեն խաղաղության և կայունության վերջնական հաստատմանը ինչպես Սիրիայում, այնպես էլ ամբողջ տարածաշրջանում»,- ասել է Պուտինը։
Նա հավելել է, որ հաշվի առնելով այն հանգամանքը, որ Աստանայի եռյակի հաջորդ գագաթնաժողովը հերթականության կարգով ենթադրվում է անցկացնել ՌԴ-ում, իրանցի ու թուրք գործընկերներին հրավիրել է գալ Ռուսաստան։
Պուտինը նաև նշել է, որ ռուս-թուրքական համագործակցությունը դինամիկ զարգանում է տարբեր ոլորտներում։
«Ուզում եմ նշել, որ քննարկվել են նաև պարենային անվտանգության հարցերը և համագործակցությունը՝ ինչպես ռուսական, այնպես էլ ուկրաինական հացահատիկի համաշխարհային շուկա մատակարարումը դյուրացնելու համար», – հավելել է ՌԴ նախագահը։
Աստանայի «եռյակը» համաձայնել է իր հովանու ներքո շարունակել փորձագիտական խորհրդակցությունները Սիրիայում կարգավորման շուրջ, հաջորդ նման հանդիպումը կանցկացվի մինչև տարեվերջ։
«Այսօր մենք պայմանավորվեցինք մեր իրանցի և թուրք գործընկերների հետ շարունակել Աստանայի ձևաչափի ներքո Սիրիայի հարցով կանոնավոր միջազգային փորձագիտական խորհրդակցությունների անցկացման պրակտիկան»,- ասել է նա։
Ռուսաստանի ղեկավարը հիշեցրել է, որ բացի երեք երկրների պատվիրակություններից, նման հանդիպումներին մասնակցում են սիրիական կողմերը՝ կառավարությունն ու ընդդիմությունը, դիտորդ պետությունները՝ Հորդանանը, Իրաքը, Լիբանանը, ինչպես նաև ՄԱԿ-ի ներկայացուցիչներ։ Ծրագրվում է նաև Աստանայի «եռյակի» արտաքին գործերի նախարարների խորհրդակցությունների կազմակերպում։
Տաթև Ֆռանգյան
