09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Չնայած ԱՄՆ կոնգրեսականների դիրքորոշմանը՝ Անկարային F-16-երի վաճառքի գործընթացը շարունակվում է
Քաղաքականություն
20.07.2022 | 10:33
ԱՄՆ-ի կողմից Թուրքիային F-16 կործանիչների մատակարարման գործընթացը շարունակվում է ՝ չնայած Ներկայացուցիչների պալատի դիրքորոշմանը։ Այս մասին հայտարարել է Թուրքիայի ԱԳ նախարար Հուլուսի Աքարը, գրում է Անադոլու գործակալությունը։
«Գործընթացը շարունակվում է։ Այս ուղղությամբ մենք շարունակում ենք մեր ջանքերը ինչպես պաշտպանական, այնպես էլ քաղաքական ու դիվանագիտական հարթություններում։ Հուսով ենք, որ ողջախոհությունը կհաղթի, և կգտնվեն կարգավորման ողջամիտ ու արդարացված ուղիներ։ Անկարան ուշադիր հետևում է այս գործընթացին»,- ասել է թուրք նախարարը։
ԱՄՆ Ներկայացուցիչների պալատը անցյալ շաբաթ ընդունել էր 2023 թ.-ի Ազգային պաշտպանության վավերացման ակտ օրենքում հայամետ չորս փոփոխությունները, որոնցից մեկն էլ վերաբերում է F-16-ի վաճառքի սահմանափակումներին։
Աքարը հայտարարել է, որ Հունաստանը Թուրքիայի կործանիչների արդիականացման հարցը հասցրել է «միջազգային իրավունքի մեջ աննախադեպ մասշտաբի»։ Նրա խոսքով՝ հունական կողմն անում է հնարավոր ամեն բան՝ ազդելու Թուրքիայի և ԱՄՆ-ի պաշտպանական կառույցների բանակցային գործընթացի վրա։ Աքարն ընդգծել է, որ այս հարցում Անկարայի բոլոր պահանջները համապատասխանում են, ինչպես ՆԱՏՕ-ի, այնպես էլ թուրք-ամերիկյան հարաբերությունների շահերին։
«ԱՄՆ ներկայացուցիչները բանակցությունների ընթացքում ընդգծում են Թուրքիայի կարևորությունը, որպես Վաշինգտոնի կարևոր դաշնակցի։ ՆԱՏՕ-ի ներկայացուցիչները ևս հայտարարում են Անկարայի դերակատարման մասին։ ԱՄՆ-ում օրենսդիրների որոշակի խումբ շահարկում է հարցը՝ ապատեղեկատվություն տարածելով։ Հույս ունենք, որ ԱՄՆ-ը չի ենթարկվի նման հնարքներին»,- հայտարարել է նա։
Էմմա Չոբանյան
