Արևմտյան Եվրոպայում սպասվում ավելի բարձր ջերմաստիճան, քան նախօրեին էր։ Օդերևութաբաններն իրավիճակն անվանում են «ջերմաստիճանային ապոկալիպսիս»։ Տաք օդային հոսանքները շարժվում են դեպի եվրոպական մայրցամաքի հյուսիս։ Ֆրանսիան և Մեծ Բրիտանիան նախազգուշացումներ են արել հանրությանը հստակ խորհուրդներով, գրում է BBC-ն:
Երեքշաբթի օրը Միացյալ Թագավորության պատմության մեջ ամենաշոգ օրն է լինելու: Օդի ջերմաստիճանը կարող է հասնել 42 աստիճանի։ Շոգը հատկապես ուժեղ կզգան Անգլիայի հարավ-արևելյան շրջաններում։
Լոնդոնի օդանավակայաններից մեկում՝ Լյուտոնում, թռիչքուղու մի մասը գրեթե հալվել է, թռիչքների չվացուցակը խախտվել է։ Բարձր ջերմաստիճանից տուժել են նաև երկրի հարավում գտնվող երկաթուղային գծերի մեծ հատվածները։
Ֆրանսիայում անտառային հրդեհների գոտիներից 30 հազար մարդ է տարհանվել։ Նանտի շրջանի կենդանաբանական այգուց շուրջ հազար կենդանի է տեղափոխվել։
Ժիրոնդի դեպարտամենտում հրդեհը ոչնչացվել է մոտ 17 հազար հեկտար անտառ։
Իսպանիայի հյուսիսում ջերմաստիճանը հասել է 43 աստիճանի։ Երկրում խափանվել է երկաթուղին. որոշ տեղերում հրդեհները հասել են մինչև երկաթուղային գծերը։ Անտառային հրդեհներ են նաև Իսպանիայում։
Օրերս Պորտուգալիայում ռեկորդային ջերմաստիճան է գրանցվել՝ +47°С։
Երկիրը հայտարարել է հրդեհի սպառնալիքի ամենաբարձր մակարդակի մասին։ Պորտուգալիայի իշխանությունները վախենում են 2017 թվականի սցենարի կրկնությունից, երբ միայն անտառային հրդեհների հետևանքով զոհվեց 66 մարդ:
Ընդհանուր առմամբ, Իսպանիայում և Պորտուգալիայում վերջին շաբաթների շոգից մահացել է մոտ հազար մարդ։
Շաբաթվա երկրորդ կեսին ռեկորդային ջերմաստիճան է սպասվում նաև Գերմանիայում, Բելգիայում և Նիդեռլանդներում։ Օդերևութաբանները նշում են, որ արդյունաբերական դարաշրջանի սկզբից մոլորակի միջին ջերմաստիճանը բարձրացել է 1,1 °C-ով։ Անոմալ շոգն ավելի ու ավելի հաճախակի է դառնում և ավելի տևական։
Տաթև Ֆռանգյան
