16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Հուլիսի 17-ին գրանցվել է +41 աստիճան ջերմություն. մինչև ե՞րբ կպահպանվի բարձր ջերմային ֆոնը․ ՏԵՍԱՆՅՈՒԹ
Հասարակություն
18.07.2022 | 11:24
«Հիմա գտնվում ենք ջերմային ալիքի գոտում, որը մեր երկիր է ներթափանցել Արաբական թերակղզուց. ջերմային ալիքի ներթափանցումն սկսվել է հուլիսի 10-ից»,- այս մասին այսօր ՝ «Ջերմային բարձր ֆոն. հրդեհային անվտանգության և առողջական հնարավոր ռիսկերը» թեմայով ասուլիսում նշեց Շրջակա միջավայրի նախարարության հիդրոօդերևութաբանության և մոնիտորինգի կենտրոնի տնօրենի տեղակալ Գագիկ Սուրենյանը:
Նրա խոսքով՝ երեկ ցերեկը Արարատյան դաշտում և Երևանում գրանցվել է 40-41 աստիճան տաքություն: Օդի ջերմաստիճանը կլիմայական նորմայից բարձր է 5-7 աստիճանով, հատկապես նախալեռնային և հովտային գոտիներում առկա է շատ բարձր հրդեհավտանգ իրավիճակ է:
Սուրենյանի դիտարկմամբ՝ հանրապետությունում ամռան ամիսներին բարձր ջերմային ֆոնը, բավական շոգ եղանակը դարձել են սովորական: Եթե տարիներ առաջ բավական շոգ եղանակ գրանցվում էր 5 տարին մեկ, ապա հիմա դա ամեն տարի է:
Հուլիսի 17-ին հանրապետությունում գրանցվել է 41 աստիճան, ինչը պատմական առավելագույն արժեքի ցուցանիշից մեկ աստիճանով ցածր է:
«Մինչև հուլիսի 21-ը ներառյալ այդ ջերմային ալիքի ազդեցությունը պահպանվելու է, ջերմաստիճանը Երևանում և Արարատյան դաշտում կտատանվի 38-40 աստիճանի սահմաններում, լեռնային հատվածներում՝ 30-33 աստիճանի սահմաններում: Միակ փոփոխությունը կլինի այն, որ հատկապես օրվա առաջին կեսին մինչև կեսօր որոշակի ամպամածություն կդիտվի, որը չի ազդի ջերմային ֆոնի վրա»,- նշեց Սուրենյանը:
Նրա խոսքով՝ հուլիսի 22-ից հետո այդ ջերմային ալիքը աստիճանաբար կնահանջի դեպի հարավ՝ իր տեղը զիջելով Սև ծովից եկող համեմատաբար սառը օդային հոսանքներին, որոնք այդքան էլ ինտենսիվ չեն: Ըստ կանխատեսումների՝ հուլիսի 22-25-ն ընկած ժամանակահատվածում ճերմաստիճանը 4-5 աստիճանով կնվազի և արդեն 23-24-ին ցերեկային ժամերին 38-40-ի փոխարեն կունենաք մինչև 34-35 աստիճան տաքություն: տեղումներ հորիզոնում չեն երևում, որովհետև ներխուժած օդը շատ չոր է:
Մանրամասները՝ տեսանյութում:
